გიგა ბოკერია - დავიკითხე იმ თემებსა და მიმართულებებზე, რაც ბიძინა ივანიშვილს ჰქონდა დაანონსებული

დავიკითხე იმ თემებსა და მიმართულებებზე, რაც ბიძინა ივანიშვილს ჰქონდა დაანონსებული, - ამის შესახებ პროკურატურის დატოვების შემდეგ საქართველოს ეროვნული უშიშროების საბჭოს ყოფილმა მდივანმა გიგა ბოკერიამ განაცხადა.

მისი თქმით, მას კითხვები დაუსვეს იმ ხარჯებთან დაკავშირებით, რომელიც არის დოკუმენტირებული, თუმცა ივანიშვილი თვლიდა, რომ ეს არ იყო მიზნობრივი. ბოკერიას ინფორმაციით, გამოძიება ამ მიმართულებით მუშაობს და გამოძიება ეხება მისი უშიშროების საბჭოს მდივნად ყოფნის პერიოდს.

მისივე თქმით, ამ დოკუმენტებიდან ნაწილს "გრიფი საიდუმლო" არ აქვს მოხსნილი. "ლობისტურ კომპანიებთან დაკავშირებით ნაწილი ინფორმაციის გასაჯაროებული იყო. მაგალითად, საჯარო იყო ინფორმაცია, რომელიც შეეხებოდა აშშ-ის ჯგუფებს, რომლებიც საქართველოს მთავრობას უწევდნენ კონსულტაციას. არის ნაწილი ინფორმაციის საჯარო, მაგრამ ეს არ ცვლის არსს", - განაცხადა ბოკერიამ.

მისი შეფასებით, დაკითხვაზე დაბარება იყო პოლიტიკური დაკვეთა. "პრობლემა მდგომარეობს არა იმაში, რომ პოლიტიკური თანამდებობის პირი დაკითხეს, არამედ პრობლემა არის საჯაროდ გაცხადებულ დაკვეთაში. მაინც და მაინც დღეს დაბარება უკავშირდება იმ კრიზისს, რაშიც იმყოფება ხელისუფლება თათუხაშვილის სიკვდილის, წიკლაურზე თავდასხმის და ზოგადად ქვეყანაში არსებული პრობლემების გამო. ეს არის პოლიტიკური ოპონენტების დევნა და ხელისუფლება მთლიანად ფოკუსირებულია მთავარი პოლიტიკური ოპონენტი ძალის განადგურებაზე", - აღნიშნა ბოკერიამ.

მისივე თქმით, დაკითხვამ ძალიან კორექტულად ჩაიარა. "სამწუხაროა, რომ პროკურატურაში მომუშავე რიგით ხალხს ფაქტობრივი მმართველი ივანიშვილი, მარიონეტი ღარიბაშვილი და პროკურატურის ფაქტობრივი მმართველი ფარცხალაძე ასეთ საქმეებზე ახარჯინებენ დროს და ენერგიას", - აღნიშნა ბოკერიამ. უშიშროების საბჭოს ყოფილი მდივნის განცხადებით, არ დაკონკრეტებულა, ზუსტად რა თანხებზეა საუბარი და რა ნაწილს მიიჩნევენ საეჭვოდ.

გიგა ბოკერია პროკურატურაში 5 საათის განმავლობაში იკითხებოდა. ბოკერიას კითხვები უშიშროების საბჭოს მიერ გაწეულ ხარჯებზე, მათ შორის ლობისტებზე დახარჯულ თანხებზე დაუსვეს.

"ინტერპრესნიუსი"