ირაკლი სესიაშვილი შსს-ს ორად გაყოფას არ გამორიცხავს

თავდაცვისა და უშიშროების საპარლამენტო კომიტეტის თავმჯდომარე ირაკლი სესიაშვილი დღის წესრიგში შს სამინისტროს ორად გაყოფას და უშიშროების სამსახურებისა და პოლიციის განცალკევებას არ გამორიცხავს.

როგორც ამ თემაზე საუბრისას სესიაშვილმა ჟურნალისტებს განუცხადა, საკითხი მსჯელობის საგანს ჯერჯერობით არ წარმოადგენს, მაგრამ არსებული რთული სისტემის პირობებში არ არის გამორიცხული სამომავლოდ დღის წესრიგში მისი რეფორმირების საკითხი დადგეს.

აღნიშნულ თემაზე ჟურნალისტებთან კომენტარი გააკეთა კონსტიტუციონალისტმა ჯონი ხეცურიანმა. ხეცურიანი კონსტიტუციაში იმ ნორმის დაბრუნების მიზანშეწონილობას ხედავს, რომელიც ძალოვანი უწყებების გაერთიანებას კრძალავდა.

როგორც ჯონი ხეცურიანმა ჟურნალისტებს განუცხადა, მისი აზრით, ძალოვანი უწყებების ერთ ჭერქვეშ თავმოყრა მიზანშეწონილი არ არის, რადგან მომეტებულ საფრთხეს ქმნის. კონსტიტუციონალისტის თქმით, ძველი ამკრძალავი ნორმით, კონსტიტუციაში დაბრუნების საკითხი შესაძლოა საკონსტიტუციო კომისიის ფარგლებში მსჯელობის საგნად იქცეს.

"ინტერპრესნიუსი"