მეტეხის ხიდიდან ქალაქის ცენტრალური ნაწილის მიმართულებით მოძრაობა პარალიზებულია

მეტეხის ხიდიდან გალაკტიონის ხიდამდე მოძრაობა პარალიზებულია და საცობია წარმოქმნილი. "ინტერპრესნიუსი" შინაგან საქმეთა სამინისტროს დაუკავშირდა, სადაც განმარტეს, რომ მოძრაობის შეფერხება ბუნებრივი აირის მილის დაზიანებას და მასზე მიმდინარე სამუშაოებს უკავშირდება. თუმცა, როგორც "ინტერპრესნიუსს" "ყაზტრანსგაზ თბილისში" განუცხადეს, მილის რეაბილიტაცია უკვე დასრულებულია.

"გაზის მილი იყო დაზიანებული, მაგრამ უკვე ერთი საათია, რეაბილიტაცია დასრულებულია. ახლა ალბათ, ასფალტის დაგების სამუშაოები მიმდინარეობს", - განაცხადეს კომპანიაში.

მათივე განმარტებით, დაზიანებული მილის აღდგენის მიზნით სპეციალური ბრიგადა ადგილზე მთელი ღამის განმავლობაში მუშაობდა.

მეტეხის ხიდიდან ქალაქის ცენტრალური ნაწილის მიმართულებით მოძრაობა შეფერხებულია. გზებზე საცობებია.

"ინტერპრესნიუსი"