ნინო ბურჯანაძე - პუტინი არ არის საქართველოს მტერი

"გაერთიანებული დემოკრატიული მოძრაობის" თავმჯდომარე ნინო ბურჯანაძეს ჟურნალისტის მხრიდან არასწორად მიაჩნია შეკითხვის იმ ფორმულირებით დასმა, არის თუ არა პუტინი საქართველოს მტერი.

"რა უნდა ეპასუხა ქვეყნის პრემიერ მინისტრს?! ეს ის შემთხვევაა, როდესაც ნამდვილად ვერ გავაკრიტიკებ ქვეყნის პრემიერ-მინისტრს. ნებისმიერი სახელმწიფოს ოდნავ ნორმალური ლიდერი რას გააკეთებდა მის ადგილზე?! რას გააკეთებდა გნებავთ პოროშენკო, გნებავთ ობამა, გნებავთ მერკელი, რას იტყოდა?! ასეთი ფორმით შეკითხვის დასმა არასწორად მიაჩნია", - განაცხადა ბურჯანაძემ პრემიერ-მინისტრის დღევანდელ პრესკონფერენციაზე აღნიშნული კუთხით განვითარებულ მოვლენაზე კომენტირებისას.

მისივე შეფასებით, პუტინი არ არის საქართველოს მტერი. "ეს შემიძლია გითხრათ მე, მიუხედავად იმისა, რომ მასთან არაერთი საუბარი მქონია - ის არ არის საქართველოს მტერი. ჩვენ ნუ ვუმტრობთ ჩვენს თავს და ისე ნუ მოვიქცევით, რომ ჩვენი საქმე გავაფუჭოთ. ეს არის ყველაზე მთავარი, ჩვენ ყველაზე მეტად ვნებთ ხოლმე საკუთარ თავს, გაცილებით მეტად, ვიდრე ნებისმიერ სხვას შეუძლია საქართველოს და ჩვენს ქვეყანას ავნოს. ის აკეთებს იმას, რაც შედის მისი სახელმწიფოს ინტერესებში, ჩვენ რომ ვაკეთებდეთ იმას, რაც შედის ჩვენი ქვეყნის ინტერესებში და არ ვიყოთ საკუთარი თავის მტრები, ასეთ შემთხვევაში ეს ნაბიჯები რუსეთის მხრიდან არ გადაიდგმებოდა. ეს შემიძლია დაზუსტებით და დაბეჯითებით გითხრათ, " - განაცხადა ნინო ბურჯანაძემ.