უკრაინის რადამ ვიქტორ იანუკოვიჩს პრეზიდენტის სტატუსი ჩამოართვა

უკრაინის უმაღლესმა რადამ ქვეყნის ექსპრეზიდენტ ვიქტორ იანუკოვიჩს პრეზიდენტის სტატუსი ჩამოართვა. "უნიანის" ცნობით, აღნიშნულ ინიციატივას 281-მა დეპუტატმა დაუჭირა მხარი. უკრაინის კონსტიტუციის მიხედვით, პრეზიდენტი სახელმწიფოს მეთაურის სტატუსს სიცოცხლის ბოლომდე ინარჩუნებს, გარდა იმ შემთხვევისა, თუ მას იმპიჩმენტის წესით არ გადააყენებენ. ვიქტორ იანუკოვიჩი 2010 წლის 25 თებერვალს აირჩიეს უკრაინის პრეზიდენტად, გასული წლის თებერვალში კი ის კიევში მასობრივი დემონსტრაციების შედეგად გადააყენეს. მოგვიანებით, იანუკოვიჩი და სხვა არაერთი ყოფილი მაღალჩინოსანი მოქალაქეების მასობრივ მკვლელობაში დაადანაშაულეს. ზოგიერთ მათგანზე საერთაშორისო ძებნაა გამოცხადებული. ამ დროისათვის ვიქტორ იანუკოვიჩის ადგილსამყოფელი უცნობია, ის სავარაუდოდ, კვლავ რუსეთში იმყოფება.

"ინტერპრესნიუსი"