საიდან იცნობს დიტო ჩუბინიძე პოლიციის მკვლელობაში ბრალდებულს? - პასუხები ჩუბინიძე-ჟორჟოლიანის სკანდალურ ურთიერთბრალდებებზე

სამართალდამცავები პოლიციელების მკვლელობაში ბრალდებულ შალვა აბულაძეს ეძებენ. მათი ინფორმაციით, შალვა აბულაძემ რამდენიმე თვის წინ ბორჯომში მოკლა პოლიციელი, ორი დღის წინ კი თბილისში, 28 წლის ბექა მარგიშვილის სიცოცხლე იმსხვერპლა.

გუშინ ტელეწამყვანმა ნანუკა ჟორჟოლიანმა "ასავალ-დასავალის" ჟურნალისტის, დიტო ჩუბინიძის და შალვა აბულაძის ფოტო გამოაქვეყნა. Ambebi.ge შეეცადა, თავად ჩუბინიძესთან გაერკვია, საიდან იცნობს შალვა აბულაძეს.

- ეს კაცი, შალვა აბულაძე იყო ჩემი რესპოდენტი, რამდენიმე ინტერვიუ მაქვს მასთან ჩაწერილი გაზეთ "ასავალ-დასავალში", მათ შორის ბოლო ჩვენი ინტერვიუ ჩაიწერა ამა წლის 19/25 იანვრის ნომერში, სადაც მან მამუკა ხაზარაძე დაადანაშაულა მის მიერ განხორციელებულ პოლიტიკურ დევნაში. მანამდე 2014 წლის 19 ოქტომბერს შალვა აბულაძემ ბორჯომში ჩაატარა ხალხმრავალი აქცია-პერფორმანსი, სადაც მან ბორჯომის ქარხნის წინ დადგა ე.წ. სიმბოლური კუბო, სადაც მიდიოდნენ ადამიანები და მიჰქნდათ ყვავილები. ეს ფოტოც იქ არის გადაღებული და "ფეისბუქზეც" მიდევს. თუ ჩემი დანაშაული ის არის, რომ როგორც ჟურნალისტმა გავაშუქე შალვა აბულაძის აქცია და გადავიღე სურათები, ეს უკვე სიგიჟის ზღვარს სცილდება. იმ დროს, როცა აქციას ატარებდა, არც დანაშაულში იყო ეს კაცი მხილებული და არც ძებნილი იყო. მერე რა მოხდა, ამის შესახებ როგორ გითხრათ?

- ინტერნეტში გავრცელდა თქვენი კომენტარი, სადაც წერთ, რომ შალვა აბულაძე პატიოსანი ადამიანია, თქვენ გეკუთვნით ეს სიტყვები?

- ეს იყო 24 თუ 25 იანვარს. გვიან ღამით დამირეკეს ჩემმა მკითხველებმა ბორჯომიდან და მითხრეს, რომ პროვოკაცია მოუწყვეს შალვა აბულაძეს და სპეც-დანიშნულების რაზმი ჩაიყვანეს ბორჯომში და აბულაძის ლიკვიდაციის მიზნით ოპერაცია მიმდინარეობსო. მე გავაკეთე ჩემი განცხადება "ობიექტივის" ეთერში, კაცმა არ იცის იქ რა მოხდა, ამ კაცს სამშობლო ძალიან უყვარს...

-  სამართალდამცავები აცხადებენ, რომ ორი პოლიციელი ემსხვერპლა ამ ადამიანს...

- გასაგებია, ქედს ვიხრი პოლიციელებს წინაშე. როგორ შეიძლება კრიმინალის გამართლება. ვინ ოხერი ამოიღებს ხმას, ვის მოუბრუნდება ენა, რომ ეს არის კარგი. კრიმინალი და მკვლელი უნდა იჯდეს ციხეში... ბოლო ინტერვიუ რომ მომცა, დაახლოებით ათ დღეში მოხდა ეს უბედურება. საიდან უნდა მენახა, რა კავშირი უნდა მქონდეს შალვა აბულაძესთან?

Ambebi.ge ნანუკა ჟორჟოლიანს დაუკავშირდა.

- აქ არ არის მთავარი, ვინ ვისთან გადაიღო ფოტო, ნახეთ მისი ჩართვა "ობიექტივზე", როდესაც ის რეკავს და ამბობს, რომ ბორჯომის პოლიცია აპირებს პროვოკაციის მოწყობას და ამ დროს ხდება საპირისპირო, იქეთ კლავენ პოლიციელს. ის ადამიანი წარსულში იგივე ბრალდებით იყო დაკავებული, 20 წელი ჰქონდა მისჯილი, ჯერ ბესელიას ამნისტია შეეხო და 8 წლამდე დაუყვანეს სასჯელი, შემდეგ უდო შეეხო. აქ მთავარი არის, ვის მხარეს დგანან ისინი. გუშინ არაერთ სააგენტოსთან თქვა დიტო ჩუბინიძემ, მე ვიცოდი ეს ბიჭი, თურქეთში რომ იყო გადასულიო. ახლა უკვე ხვდება, რომ დიდ სკანდალში გაეხვა და რაღაცები უკან მიაქვს. თუმცა სხვადასხვა ჟურნალისტის მიერ არის ჩაწერილი მისი კომენტარები. მან იცის, ძებნილი სად დადის და დღესაც იგივეს იმეორებს - დრო დაადგენს ყველაფერს. გამოვიდეს და ღიად მოყვეს, რა ურთიერთობა აქვს ადამიანთან, რომელიც პოლიციელებს ხოცავს ქუჩაში.

თამარ ბოჭორიშვილი

AMBEBI.GE

იხილეთ ვიდეო: შალვა აბულაძის ინტერვიუ და კადრები აქციიდან, რომელიც მან ბორჯომში გამართა