ბორის ნემცოვის ქალიშვილმა მუქარის შემცველი შეტყობინებების გამო რუსეთი დატოვა

რუსი ოპოზიციონერის, ბორის ნემცოვის უფროსმა ქალიშვილმა რუსეთი დატოვა. ამის შესახებ ბრიტანული გამოცემა The Times იტყობინება. გავრცელებული ცნობით, ჟანა ნემცოვამ რუსეთის ტერიტორიის დატოვების გადაწყვეტილება მუქარის შემცველი შეტყობინებების გამო მიიღო.

როგორც ბრიტანული გამოცემა იტყობინება, ნემცოვა არ ასახელებს თავის ადგილსამყოფელს და ამბობს, რომ არ იცის, თუ როდის დაბრუნდება კვლავ რუსეთში. მისივე თქმით, ყველა, ვინც აკრიტიკებს რუსეთის მთავრობას, საფრთხის ქვეშ იმყოფება. ჟანა ნემცოვა მამის, ბორის ნემცოვის მკვლელობაზე პასუხისმგებლობას ვლადიმერ პუტინს აკისრებს.

რუსი ოპოზიციონერი, ბორის ნემცოვი მოსკოვის ცენტრში კრემლთან ახლოს 27 თებერვალს მოკლეს. მას ოთხი ტყვია ესროლეს, რის გამოც იგი ადგილზევე გარდაიცვალა. მას თან უკრაინელი მეგობარი გოგონა, ანნა დურიცკაია ახლდა, რომელიც არ დაშავებულა. ნემცოვის მკვლელობის საქმესთან დაკავშირებით დაკავებულია ხუთი ადამიანი.

"ინტერპრესნიუსი"