"სახელმწიფო ძალადობს სასამართლოზე და მართლმსაჯულებაზე" - გიორგი ოქროპირიძის დედა

სახელმწიფო ძალადობს სასამართლოზე, - ამის შესახებ გიორგი ოქროპირიძის დედამ, ცირა გოდერძიშვილმა ჟურნალისტებს გიორგი ოქროპირიძისთვის აღკვეთი ღონისძიების შეფარდების შემდეგ განუცხადა.

როგორც ცირა გოდერძიშვილმა განაცხადა, სასამართლომ გამოიტანა უსამართლო გადაწყვეტილება. "სახელმწიფო ძალადობს სასამართლოზე და მართლმსაჯულებაზე", - განაცხადა ცირა გოდერძიშვილმა. მისი თქმით, მოსამართლის გადაწყვეტილება გიორგი ოქროპირიძის ოჯახის წევრებისთვის მიუღებელია.

მოსამართლის გადაწყვეტილებით კმაყოფილია ლაშა მახარაძის ოჯახი. როგორც გარდაცვლილი ლაშა მახარაძის დედამ ნინო დიდებულიძემ განაცხადა, გიორგი ოქროპირიძეს უნდა მიესაჯოს სამუდამო პატიმრობა და მან სასჯელაღსრულების დაწესებულება არ უნდა დატოვოს.

"პატიმრობის შეფარდებით კმაყოფილი ვარ. მე ვფიქრობ, რომ გიორგი ოქროპირიძეს სამუდამო პატიმრობაც უნდა მიესაჯოს და ის თავისუფლებაზე არ უნდა იყოს", - განაცხადა ნინო დიდებულიძემ.

ამ დროისთვის თბილისის საქალაქო სასამართლოს ტერიტორია დატოვეს როგორც გიორგი ოქროპირიძის, ასევე ლაშა მახარაძის ოჯახის წევრებმა. მათ შორის პროცესის დასრულების შემდეგ იყო მცირე სიტყვიერი შელაპარაკება, რომელიც გართულების გარეშე დასრულდა.

"ინტერპრესნიუსი"