ალექსანდრე კვიტაშვილი უკრაინის ჯანდაცვის მინისტრობიდან ვერ გადააყენეს
უმაღლესმა რადამ ალექსანდრე კვიტაშვილი უკრაინის ჯანდაცვის მინისტრის პოსტიდან ვერ გადააყენა. როგორც უკრაინული მედია იტყობინება, დეპუტატებმა შესაბამის გადაწყვეტილებას ოთხჯერ უყარეს კენჭი, თუმცა კვიტაშვილის პოსტიდან გასათავისუფლებლად საკმარისი ხმა ვერ შეგროვდა. უკრაინელი დეპუტატების წინაშე თავად მინისტრიც წარდგა და შეახსენა მათ, რომ გადადგომის შესახებ განცხადება ჯერ კიდევ ორი თვის წინ დაწერა.
"სავარძელს არ ვეჭიდები და არც კარიერის გასაკეთებლად არ მოვსულვარ", - განაცხადა კვიტაშვილმა.
როგორც გამოცემა "უკრაინსკაია პრავდა" წერს, ჯანდაცვის მინისტრმა განაცხადა, რომ უკრაინის პატრიოტია და მზად არის, ქვეყნისთვის მომავალშიც იმუშავოს, თუმცა ჯანდაცვის რეფორმებს ვერ ატარებს იმის გამო, რომ ჯანდაცვის საკითხების საპარლამენტო კომიტეტი ჯანდაცვის სფეროში სახელმწიფო შესყიდვების პროცესს აფერხებს. "ამ კომიტეტთან მუშაობა არ შემიძლია", - აღნიშნა კვიტაშვილმა.
ალექსანდრე კვიტაშვილი უკრაინის ჯანდაცვის მინისტრად გასული წლის ბოლოს დანიშნეს. იგი ანალოგიურ თანამდებობას საქართველოში 2008-2010 წლებში იკავებდა.
როგორ მოპარა კორონავირუსის ახალმა სახეობამ ბრიტანელებს შობა - ფოტოებში ასახული პანდემიის სევდა
"ამით შევქმნით დაცვის ფარს, რაც დაასრულებს პანდემიას" - ენტონი ფაუჩიმ კორონავირუსის საწინააღმდეგო ვაქცინა პირდაპირ ეთერში გაიკეთა
