"უბედურების ზონა" "შავი ოქროს" ქალაქში

37-ჯერ დაბინძურებული ჰაერი და მხოლოდ ერთ თვეში, ერთ საცხოვრებელ კორპუსში, სიმსივნით გარდაცვლილი 4 ადამიანი. ჭიათურელები ქალაქიდან და იმ 12 სოფლიდან გასახლებას ითხოვენ, სადაც მანგანუმის მოპოვება ხდება და ამბობენ, რომ სიმსივნით დაავადებულთა რაოდენობამ სამჯერ იმატა. "ჯორჯიან მარგანეცი" კი წარმადობას ზრდის. 2014 წელს მან თავისი სალიცენზიო კონტურები სამ სხვადასხვა საშუამდგომლო კომპანიას გადასცა, რომელმაც თავის მხრივ კიდევ სხვა კომპანიებს მისცეს მუშაობის უფლება. საერთო ჯამში, დღეს ჭიათურაში მანგანუმის მოპოვებას 40-ზე მეტი სხვადასხვა კომპანია ახორციელებს.

როსტომ ცერცვაძე, როგორც თავად ამბობს, ძირძველი ჭიათურელია, პროფესიით სამთო ინჟინერს ყველაზე მეტად საკუთარ ქალაქზე უჭირს საუბარი, თუმცა გაჩუმებაც დანაშაულად მიაჩნია და ამიტომ მასზე ლაპარაკს ემოციების გარეშე ვერასდროს ახერხებს. ჭიათურ მანგანუმში 15 წელი მთავარ ინჟინრად იმუშავა და ახლა ამდენივე ხანია უმუშევარია. ამბობს, რომ "ჯორჯიან მარგანეცში" ახლა მუშაობა თვითმკვლელობაზე ხელის მოწერაა.

"ერთი ჩრდილოეთ კორეას ქონდა ასეთი სამუშაო ზონები, 8 მეტრიანი კედლითა და მავთულხლართებით და მეორე - "ჯორჯიან მარგანეცს" ჭიათურაში. ვიყავი მიწის ქვეშაც და მიწის ზევითაც, მაღაროშიც და ღია კარიერზეც, ახლა შორიდან ვუყურებ, როგორ ვნადგურდებით ყველა. საჩხერიდან რომ გადმოუხვევ, დიდი ლურჯი აბრა დგას "ჭიათურაო" აწერია, შეცვალონ ბატონო და დააწერონ "უბედურების ზონა". ქალაქში, სადაც ლარის ფასი უფრო მაღალია, ვიდრე ადამიანის, იქიდან ხალხი უნდა გაასახლონ. აქ მხოლოდ სიკვდილმისჯილები უნდა ჩამოყავდეთ, გაგიკვირდებათ და მკითხავთ რატომო? იმიტომ ჩემო ბატონო, რომ "ჯორჯიან მარგანეცის" მუშა აქ რომ სიმსივნით დაავადდა, საავადმყოფომ ცნობა არ გასცა, რომ სამკურნალო თანხა მოეთხოვა კაცს. ისე მოკვდა საწარმოო ტრავმად არავინ შეუფასა",- ამბობს როსტომ ცერცვაძე.

ჭიათურელებისთვის "ჯორჯიან მარგანეცი" ერთადერთი ადგილია, სადაც შეიძლება დასაქმდნენ, ერთადერთია, საიდანაც ოჯახის რჩენა და გამოკვება შეუძლიათ. მიუხედავად ამისა, კომპანიაში მთელი მუნიციპალიტეტის მოსახლეობის მხოლოდ 10%-ია დასაქმებული.

ჭიათურის მოსახლეობა ადრე 56 000-ს ითვლიდა, დღეს კი თანამედროვე აღწერით, რაოდენობა 14 ათასით შემცირდა და 32 000 დარჩა.

იხილეთ ვრცლად

kutaisipost.ge