დაჭრილ მოზარდებს ამ წუთებში გადაუდებელი სამედიცინო დახმარება უტარდებათ

დაჭრილ მოზარდებს ამ წუთებში რესპუბლიკურ საავადმყოფოში გადაუდებელი ოპერაცია უტარდებათ. როგორც AMBEBI.GE-ს კორესპონდენტი ადგილიდან იტყობინება, საავადმყოფოში დაჭრილი მოზარდების მშობლები და ახლობლები მივიდნენ. ისინი მომხდართან დაკავშირებით ინფორმაციას არ ფლობენ და, შესაბამისად, ჟურნალისტებთან კომენტარი არ გაუკეთებიათ.

დაჭრილი მოზარდები თბილისის #35-ე საჯარო სკოლის მოსწავლეები არიან. არსებული ინფორმაციით, ერთ-ერთ მათგანს ფილტვის არეში შემავალი ჭრილობა აქვს მიყენებული. ადგილზე იმყოფება პოლიცია. ჯერჯერობით უცნობია, რა გახდა მოზარდების დაჭრის მიზეზი.

როგორც შინაგან საქმეთა სამინისტროს პრესსამსახურში აცხადებენ, მომხდართან დაკავშირებით გამოძიება სსკ-ის 117-ე მუხლით მიმდინარეობს, რაც ჯანმრთელობის განზრახ მძიმე დაზიანებას გულისხმობს.