ლიტერატურული კონკურსი "საბა" – 2018 დაიწყო

თიბისი ბანკმა ლიტერატურული კონკურსი "საბას" დაწყება გამოაცხადა. კონკურსზე წიგნების წარდგენა უკვე შეუძლიათ ავტორებსა და გამომცემლებს.

2018 წელი პრემია "საბასთვის" განსაკუთრებული იქნება - წლევანდელი დაჯილდოების საზეიმო ცერემონია გერმანიაში, ფრანკფურტის წიგნის საერთაშორისო ბაზრობის ქართული პროგრამის ფარგლებში გაიმართება.

როგორც ცნობილია, 2018 წელს ფრანკფურტის წიგნის საერთაშორისო ბაზრობაზე საქართველო საპატიო სტუმარი ქვეყნის სტატუსით წარდგება. მთელი წლის განმავლობაში, გერმანიის სხვადასხვა ქალაქში, ასობით ღონისძიება იგეგმება, რომელიც ქართული ლიტერატურის და კულტურის პოპულარიზაციას ისახავს მიზნად. პროგრამის მთავარი ნაწილი 9-14 ოქტომბერს, წიგნის საერთაშორისო ბაზრობის დღეებზე, ქ. ფრანკფურტში დაგეგმილი ლიტერატურულ-კულტურული ღონისძიებებია.

ქართული პროგრამის ერთ-ერთი ყველაზე მასშტაბური და გამორჩეული ღონისძიება სწორედ პრემია "საბას" დაჯილდოების ცერემონია იქნება, რომელიც 2018 წლის 12 ოქტომბერს, ქ. ფრანკფურტის მერიის ისტორიულ დარბაზში Kaisersaal ჩატარდება.

ცერემონიას, ქართველ ავტორებთან, გამომცემლობებთან, საქართველოს ოფიციალურ დელეგაციასთან ერთად, საპატიო უცხოელი სტუმრებიც დაესწრებიან - ცნობილი მწერლები, უცხოური გამომცემლობები, გერმანიის ოფიციალური პირები, საერთაშორისო მედია... დაჯილდოების ცერემონიისთვის თვალის მიდევნება ქართველ საზოგადოებას პირდაპირი სატელევიზიო და ონლაინ ეთერით შეეძლება.

"დღეს მნიშვნელოვანი დღეა, რადგან გამოცხადდა ლიტერატურული კონკურსის "საბას" დაწყება, გამოცხადდა წელს დაგეგმილი ცვლილებები. ფრანკფურტში ჩატარებული "საბას" დაჯილდოება, ხელს შეუწყობს ქართული წიგნის, ლიტერატურის პოპულარიზაციას მთელ მსოფლიოში, ვინაიდან ფრანკფურტის წიგნის ბაზრობაზე იქნება კონცერტრირებული მთელი მსოფლიოს მკითხველთა და წიგნის გამომცემელთა ყურადღება. " განაცხადა მწერალმა - რატი ამაღლობელმა.

საკონკურსო წიგნების კონკურსზე წარდგენა დღეიდან იწყება. რეგისტრაციისთვის კონკურსანტებმა უნდა შეავსონ ელექტრონული განაცხადი ვებგვერდზე saba.com.ge. განცხადების მიღება 20 თებერვლამდე გაგრძელდება.

დაჯილდოების ცერემონიის ფრანკფურტში გადატანასთან დაკავშირებით, "საბას" წლევანდელ საკონკურსო პირობებში მცირე ცვლილებებია, კერძოდ, 2018 წელს "საბა" გაიცემა შემდეგ ნომინაციებში:

1. საუკეთესო რომანი

2. საუკეთესო პროზაული კრებული

3. საუკეთესო პოეტური კრებული

4. საუკეთესო ესეისტიკა და დოკუმენტური პროზა

5. საუკეთესო ლიტერატურული დებიუტი

6. საუკეთესო ქართული თარგმანი

7. ქართული ნაწარმოების საუკეთესო უცხოენოვანი თარგმანი

8. ქართული ლიტერატურის საუკეთესო უცხოენოვანი კრიტიკა

9. ქართული ლიტერატურის საუკეთესო უცხოენოვანი გამომცემლობა

10. პრემია ქართულ-გერმანულ ლიტერატურულ ურთიერთობებში შეტანილი წვლილისათვის

2018 წელს, საკონკურსო ნომინაციებს შორის არ მოხვდა "საუკეთესო პიესა" და "საუკეთესო ლიტერატურული კრიტიკა". თუმცა, ამ ორ ნომინაციაში წარდგენილი წიგნები "საბას" ყურადღების მიღმა არ დარჩება და მათი განხილვა 2019 წლის კონკურსზე მოხდება.

ნომინაციაში, " საუკეთესო ელექტრონული წიგნი" წელს პრემია ცალკე აღარ გაიცემა, თუმცა ყველა ელექტრონულ წიგნს ექნება შესაძლებლობა, მონაწილეობა მიიღოს კონკურსში, ბეჭდურ წიგნებთან ერთად.

საკონკურსო წიგნების სია თებერვლის ბოლოს "საბას" ვებგვერდზე saba.com.ge გამოქვეყნდება, სადაც კონკურსის მსვლელობის პარალელურად, განთავსდება საკონკურსო წიგნების ელექტრონული ვერსიები და საზოგადოებას საშუალება ექნებ გაეცნოს მათ.

კონკურსის ფინალისტების ვინაობა ივლისში გახდება ცნობილი. 12 ოქტომბერს კი, ფრანკფურტში დაგეგმილ ცერემონიაზე გამოცხადდებიან კონკურსის გამარჯვებულები, რომლებიც დაჯილდოვდებიან თიბისი ბანკისგან "საბას" პრიზითა და ფულადი პრემიებით.

ყოველწლიური ლიტერატურული კონკურსი "საბა" თიბისი ბანკმა 2003 წელს დააფუძნა. წელს "საბას" კონკურსი მეთექვსმეტედ ჩატარდება.

თეკლე ჯანელიძე