აფხაზეთის "სახელმწიფო ჰიმნის" მუსიკის 71 წლის ავტორი, პედოფილიის ბრალდებით დააკავეს

აფხაზეთის "სახელმწიფო ჰიმნის" მუსიკის 71 წლის ავტორი, პედოფილიის ბრალდებით დააკავეს

აფხაზეთის ე.წ. პროკურატურამ ცნობილი ადგილობრივი კომპოზიტორის, "სახელმწიფო ჰიმნის" მუსიკის ავტორის, ვალერი ჭკადუას წინააღმდეგ, არასრულწლოვანზე სექსუალური ძალადობის მუხლით "სისხლის სამართლის საქმე აღძრა..."

აფხაზური მედიის ინფორმაციით, 14 თებერვალს სოხუმში კიდევ ერთი პედოფილიის ფაქტი მოხდა, - ადგილობრივ "პროკურატურაზე" დაყრდნობით ვრცელდება ინფორმაცია, რომ აფხაზმა მუსიკოსმა მუსიკალური სკოლის მოსწავლე არასრულწლოვან გოგონაზე სექსუალურად იძალადა. აფხაზური მედიის ინფორმაციით, დაზარალებულის ოჯახი მუსიკოსის "ლინჩის წესით" გასამართლებას ითხოვს.

ჭკადუა რეგიონში ერთ-ერთი ყველაზე პოპულარული მუსიკალური სკოლის დამფუძნებელი იყო, სადაც სკოლის მოსწავლეებს ინსტრუმენტებზე დაკვრასა და სიმღერას ასწავლიდა. მისი დახმარებით არაერთმა ადგილობრივმა მუსიკოსმა გაიკვლია გზა ადგილობრივი თუ რუსული სცენისკენ... ვინაიდან ის რეგიონში ცნობილი მუსიკოსია, საკმაოდ მაღალანაზღაურებადი პედაგოგი იყო და მასთან მოხვედრა, ხშირ შემთხვევაში, ნაცნობობითა და "ჩაწყობებითაც" ხდებოდა...

ვალერი ჭკადუამ 1977 წელს თბილისის ვანო სარაჯიშვილის სახელობის სახელმწიფო კონსერვატორია, 1980 წელს კი, ასპირანტურა დაამთავრა. 1980-81 წლებში მუშაობდა აფხაზეთის ავტონომიური რესპუბლიკის შემოქმედებითი სახლის, ფოლკლორის განყოფილების სამეცნიერო და ფოლკლორულ უფროს მეთოდისტად... არის 1994 წელს დაარსებული აფხაზეთის ე.წ. კომპოზიტორთა კავშირის წევრი. ასევე, უფრო ადრეული, 1978 წლიდან აფხაზ მწერალთა ასოციაციის წევრი; 2008 წლიდან კი ის დიმიტრი გულიას სახელობის "სახელმწიფო პრემიის" ლაურეატია.

ჰიმნის გარდა, 71 წლის მუსიკოსი პირველი აფხაზური ბალეტი "რიწას" მუსიკის ავტორია. თუმცა, ბალეტი, შემსრულებლების არყოლის გამო, სოხუმის სცენაზე ვერ დაიდგა...

2009 წლის აფხაზეთის "საპრეზიდენტო არჩევნების" დროს, ის აცხადებდა, რომ "აფხაზეთმა უკვე აირჩია თავისი გზა და თავისი მომავალი... მას აქვს დემოკრატიული პროგრამები და ჰყავს მეგობარი - დიდი რუსეთი..."

2017 წლის 27 ივნისს, მას 70 წელი შეუსრულდა - ცნობილ მუსიკოსს, სოხუმში, საკმაოდ ხმაურიანი იუბილე გადაუხადეს, რომელსაც აფხაზური და რუსული მედიის გარდა, ადგილობრივი "ხელმძღვანელობის" პირველი პირებიც დაესწრნენ... სწორედ იმ დღეს, ჭკადუას მიერ დაარსებული სოხუმის მუსიკალური სკოლის დირექტორი, ნინელი ბჟანია სიამაყით აცხადებდა, რომ ვალერი ჭკადუამ მუსიკალური განათლება თბილისში მიიღო...

"მან მუსიკალური განათლება თბილისის კონსერვატორიაში მიიღო და არაერთი წარმატებული აფხაზი მუსიკოსი აღზარდა. ასობით მუსიკალური ნაწარმოების ავტორია და მათგან ბევრს, სამწუხაროდ, ჩვენი მსმენელი არც იცნობს. ის წერს მუსიკას ბავშვებისთვისაც," - აცხადებდა ის.

აფხაზი მუსიკოსის დაკავებისა და მის წინააღმდეგ "აღძრულ საქმეს", ადგილობრივ სოციალურ ქსელებში მოჰყვა მწვავე გამოხმაურება:

"ცნობისთვის, ეს პირველი შემთხვევა არ არის, - ასეთივე ფაქტი რამდენიმე წლის წინაც მოხდა, თუმცა, მისი გავლენიანი ახლობლებისა და წრის დახმარებით, საქმე ჩაიფარცხა - გაუშვეს, მაგრამ იმ პირობით, რომ აფხაზეთი უნდა დაეტოვებინა... მაგრამ რა?.. როგორც ვნახეთ, - არც არაფერი. ეტყობა, ახლა ვიღაც გავლენიანი ოჯახის შვილი გააუბედურა. ეს უნდა მომხდარიყო, რომ დაესაჯათ?.. "

"ჯერ არ დამტკიცებულა... ხავსს ვეჭიდები, იქნებ არ ჩაუდენია... იქნებ შეცდნენ... მერამდენედ უნდა მოხდეს ასეთი მარაზმი ქვეყანაში. დაგვწყევლა ვინმემ?.. იმედია, საქმეს გამოიძიებენ და დამნაშავე დაისჯება... არც კი ვიცი, რა ვთქვა..."

"სირცხვილი. ჰიმნის ავტორი პედოფილია. აწი როგორღა მოვუსმინოთ ჰიმნს. ჩვენ, უბრალო, გულგატეხილი ხალხი მაინც შეგვიბრალეთ... რაღაც ხომ უნდა არსებობდეს წმინდა?.."

"რა გასამართლება ხალხო - ეგრევე უნდა დახვრიტონ, რომ ვიღაც სხვა ავადმყოფმაც იგივე არ გააკეთოს. გამოიყვანეთ და სახალხოდ დახვრიტეთ."

"გუშინ სოხუმში მხოლოდ ამაზე ლაპარაკობდნენ. თქვეს, რომ ეს მეორე შემთხვევაა, მაგრამ პირველი "ჩაფარცხეს". აქ შეიძლება ჭკუიდან შეიშალო,"- წერენ აფხაზები.

ლალი პაპასკირი

AMBEBI.GE

სომხური მედია - მთიან ყარაბაღში "ფრანს-პრესის" თანამშრომლებს თავს დაესხნენ

"გამარჯვების მოედანზე დაჩოქება და დაწვა ელოდება" - როგორ ეხმაურებიან აფხაზები ირაკლი ბებუას დაკავებას, რომელმაც "დამოუკიდებლობის დღეს" აფხაზეთის დროშა დაწვა

ოკუპირებულ აფხაზეთში კორონავირუსით კიდევ 1 ადამიანი გარდაიცვალა, ინფიცირებულთა რიცხვი კი 20-ით გაიზარდა