ტრამპის წინასაარჩევნო შტაბის ყოფილ ხელმძღვანელს 80 წლიანი პატიმრობა ემუქრება

სპეციალურმა პროკურორმა რობერტ მუელერმა, რომელიც ამერიკის 2016 წლის საპრეზიდენტო არჩევნებში რუსეთის ჩარევის საქმეს იძიებს, გუშინ დონალდ ტრამპის წინასაარჩევნო შტაბის ყოფილ ხელმძღვანელს პოლ მანაფორტს ახალი ბრალდებები წაუყენა. მას რამდენიმე ათეული მილიონი აშშ დოლარის „გათეთრება“ ედება ბრალად.

„მანაფორტმა თავისი პარტნიორის რიჩარდ გეიტსის დახმარებით 30 მილიონ დოლარზე მეტი „გაათეთრა“, ეს არის შემოსავალი, რომლის შესახებაც ინფორმაცია დამალა აშშ-ს ხაზინის დეპარტამენტის, იუსტიციის დეპარტამენტისა და სხვებისგან. გეიტსმა 3 მილიონ დოლარზე მეტი ოფშორული ანგარიშებიდან მიიღო. აღნიშნული შემოსავალი მანაც დამალა ხაზინისა და იუსტიციის დეპარტამენტებისგან“, - ნათქვამია საბრალდებო დოკუმენტში. 

გუშინ გეიტსსა და მანაფორტს 32 პუნქტიანი ბრალდება წაუყენეს, რაც დაკავშირებულია საბანკო და საგადასახადო სფეროებში თაღლითობასთან.

მუელერი აღნიშნავს, რომ ბრალდებულები უკრაინაში საქმიანობის შედეგად მილიონობით დოლარის შემოსავალს იღებდნენ.

„2006 წლიდან დღემდე მანაფორტი და გეიტსი მონაწილეობდნენ შემოსავლების დამალვის სქემაში, სარგებლობდნენ და იყენებდნენ ამ ფულად სახსრებს“, - ნათქვამია დოკუმენტში.

გამოძიების მონაცემების თანახმად, მათ ოფშორული ანგარიშებიდან 75 მილიონ დოლარზე მეტი მიიღეს, თუმცა მანაფორტს შემოსავლიდან შესაბამისი გადასახადი არ გადაუხდია და ის გეიტსის დახმარებით დამალა. 

Associated Press აღნიშნავს, რომ თუ მათი ბრალეულობა პირველი 12 პუნქტის მიხედვით მაინც დადგინდება, მანაფორტს 80 წლით, ხოლო გეიტსს 70 წლით თავისუფლების აღკვეთა ემუქრება.