ანტისანიტარია და ღირსების შემლახავი პირობები - სურამის ფსიქიატრიული საავადმყოფო ომბუდსმენმა მოინახულა

სურამის ფსიქიატრიული საავადმყოფოს პაციენტები ადამიანის ღირსების შემლახავ პირობებში იმყოფებიან, ამის შესახებ სახალხო დამცველი აცხადებს. ნინო ლომჯარიამ ფსიქიატრიული დაწესებულება გუშინ მოინახულა.

ომბუდსმენის შეფასებით, "სურამის ფსიქიატრიული საავადმყოფოს" მთლიანი შენობა, როგორც საცხოვრებელი, ასევე საერთო სარგებლობის ტერიტორიები ძველი და გაუმართავია, ძველია ინვენტარიც, უკიდურესად მძიმეა სანიტარულ-ჰიგიენური მდგომარეობა და ხაზგასმით აღნიშნავს, რომ არ არსებობს თერაპიული გარემო.

სახალხო დამცველის სპეციალური პრევენციული ჯგუფის შეფასებით, გაწეული ფსიქიატრიული დახმარება არაადეკვატურია.

ნინო ლომჯარია მიიჩნევს, რომ ხელისუფლებამ სასწრაფოდ უნდა მიმართოს შესაბამის ზომებს, რათა შეძლებისდაგვარად გაუმჯობესდეს ა.ქაჯაიას სახელობის "სურამის ფსიქიატრიული საავადმყოფოში" განთავსებულ პაციენტთა პირობები.