მალხაზ მაჩალიკაშვილი - ვიდრე ტატუნაშვილის ცხედარს ოჯახს არ გადასცემენ, აქციების გამართვა არასწორია

ვფიქრობ, რომ ვიდრე ტატუნაშვილის ცხედარს ოჯახს არ გადასცემენ, აქციების გამართვა არასწორია. მე მათ მდგომარეობაში შევდივარ, ისინიც ჩემსავით შვილმკვდარი მშობლები არიან, - ამის შესახებ "ინტერპრესნიუსს" თემირლან მაჩალიკაშვილის მამამ განუცხადა. მალხაზ მაჩალიკაშვილი თბილისში აქციის გამართვაზე საუბრობს, თუმცა ამ ეტაპზე ზუსტ დროს ვერ ასახელებს.

"მას შემდეგ, რაც ხელყუმბარასთან დაკავშირებით ექსერტიზის პასუხს გავეცანი, უფრო მეტი კითხვა გამიჩნდა, ვიდრე პასუხები მქონდა. სწორედ ამიტომ, ხეობის მცხოვრებლებმა და ჩვენ გადავწყვიტეთ პროტესტი აქციების სახით გამოვხატოთ. იქნებ პროტესტის ამ ფორმამ გამოიღოს შედეგი და მოხდეს ყველა იმ პირის დასჯა, ვინც ჩემი უდანაშაულო შვილი საკუთარ საძინებელში მოკლა, თუმცა აქციების ზუსტი დროის თქმა ამ ეტაპზე არ შემიძლია. ჩვენ მზად ვართ და პარასკევს ვაპირებდით აქციის გამართვას, მაგრამ ვფიქრობ, რომ ტატუნაშვილების ოჯახს ვიდრე ცხედარს არ გადმოსცემენ, აქციების გამართვა არასწორია. მე მათ მდგომარეობაში შევდივარ, ისინიც ჩემსავით შვილმკვდარი მშობლები არიან. ვფიქრობთ, სავარაუდოდ, ორშაბათს გავმართოთ აქცია, თუმცა არც ეს დროა ზუსტი. ვნახოთ, როგორ განვითარდება მოვლენები", - აღნიშნა მალხაზ მაჩალიკაშვილმა.