12 აპრილს, "ბიბლუსი გალერეა" პერსონალურ მონაცემთა დაცვის თემაზე გამართულ ღონისძიებას უმასპინძლებს

12 აპრილს, თბილისში, კანდელაკის 7–ში, მდებარე „ბიბლუსი გალერეა“ პერსონალურ მონაცემთა დაცვის ინსპექტორის აპარატის წარმომადგენელ, ინფორმაციული უსაფრთხოების ოფიცერ ალექსანდრე მეზურნიშვილს უმასპინძლებს.

რა ღირს ჩვენი პერსონალური მონაცემები, როგორ მოვიქცეთ ინტერნეტში მათი უსაფრთხოების დასაცავად და როგორ არ უნდა გავხდეთ ციფრული თაღლითობის მსხვერპლი,– ეს იმ საკითხების მცირე ჩამონათვალია, რომელზეც მეზურნიშვილი „ბიბლუსი გალერეაში“ დაგეგმილ შეხვედრაზე ისაუბრებს.

„თითოეული ჩვენგანი უამრავ აპლიკაციას, საძიებო სისტემას, სოციალურ ქსელს, ონლაინ მომსახურებას იყენებს. ნაწილი ფასიანია, ნაწილი - არა. თუმცა, ბევრს, შესაძლოა, არ უფიქრია იმაზე რომ უფასო მომსახურებებიც არ არის ბოლომდე უფასო და მათ მისაღებად ჩვენს პერსონალურ მონაცემებს „ვიხდით”,– ნათქვამია „ბიბლუსის“ ოფიციალურ ფეისბუქგვერდზე გავრცელებულ ინფორმაციაში.

შეგახსენებთ, რომ „ბიბლუსი გალერეაში“ დაანონსებული ღონისძიება წიგნის მაღაზიათა ქსელის „ბიბლუსის“ და პერსონალურ მონაცემთა დაცვის ინსპექტორის აპარატის ორგანიზებით იმართება. ინსპექტორის აპარატი საქართველოში 2013 წლიდან არსებობს. მისი საქმიანობის ძირითადი მიმართულება საჯარო და კერძო დაწესებულებებისათვის, აგრეთვე ფიზიკური პირებისათვის მონაცემთა დაცვასთან დაკავშირებულ საკითხებზე კონსულტაციის გაწევაა. მონაცემთა დაცვასთან დაკავშირებული განცხადებების განხილვა, საჯარო და კერძო დაწესებულებებში მონაცემთა დამუშავების კანონიერების შემოწმება.

ასევე, საქართველოში მონაცემთა დაცვის მდგომარეობისა და მასთან დაკავშირებული მნიშვნელოვანი მოვლენების შესახებ საზოგადოების ინფორმირება.

აღსანიშნავია, რომ 12 აპრილს, „ბიბლუსი გალერეაში“ დაანონსებული ღონისძიება 19:00–ზე დაიწყება. სტუმრებს შესაძლებლობა ექნებათ დასვან მათთვის საინტერესო შეკითხვები. ყველაზე აქტიურ მსმენელებს კი ინსპექტორის აპარატი სპეციალურ საჩუქრებსაც გადასცემს. ღონისძიებაზე დასწრება თავისუფალია. დეტალური ინფორმაციისთვის გადადით ბმულზე:https://www.facebook.com/events/524641244599738/