"კრიპტოვალუტა", რომელიც თბილისის არქიტექტურას ამახინჯებს

კოეფიციენტი K2 თბილისში ყბადაღებული თემა და ყველა მმართველის თავისტკივილია. ის ერთგვარ „კრიპტოვალუტად“ ჩამოყალიბდა, რომელიც, ბლოკჩეინ ტექნოლოგიების ნაცვლად, მაღალჩინოსნებისა და გავლენიანი პირების „დაინტერესებით“ გამომუშავდება.

კომპანია „არსის“ აღმასრულებელი დირექტორი თორნიკე აბულაძე კატეგორიული წინააღმდეგია იმ მანკიერი პრაქტიკისა, როდესაც კონკრეტული, დაინტერესებული პირები თბილისში მიწის ნაკვეთებზე მშენებლობის კოეფიციენტების ცვლილებას ახორციელებენ.

თორნიკე აბულაძის თქმით, დაუშვებელია კოეფიციენტის შეცვლა თუნდაც ოფიციალური, დღეს მოქმედი ნორმატიული აქტებით დაშვებული გამოსყიდვის წესითაც კი.

ცალკეული სამშენებლო კომპანიებისა თუ კერძო პირებისთვის კოეფიციენტების გაზრდით, გარდა დედაქალაქის იერსახისა, მიწის ბაზარიც ზარალდება და გაზრდილკოეფიციენტიანი ტერიტორიების მომიჯნავე უძრავი ქონების მესაკუთრეებს უძრავი ქონება უიაფდებათ.

K2 კოეფიციენტის გაზრდა ახდენს თბილისის დეკაპიტალიზაციას, ამით მთელი უბნები უფასურდება.

K2 კოეფიციენტი ერთგვარი თბილისური კრიპტოვალუტა გახდა – როცა ბოლომდე ვერ ხვდებიან, რა არის, როგორ კეთდება, მაგრამ იციან, რომ ამით მეტი ფულის „შოვნა“ შეიძლება, თუმცა თბილისზე ისეთივე ნეგატიურ და წარუშლელ კვალს ტოვებს, როგორც მძიმე ნარკოტიკი ადამიანის ორგანიზმზე და გამოსწორებას არ ექვემდებარება.

ამის ერთ-ერთ მაგალითად თორნიკე აბულაძე ვაკეში, მცხეთის ქუჩაზე განვითარებულ სამშენებლო პროცესებს ასახელებს. ამ ტერიტორიაზე კომპანიებმა მაღალი K2 კოეფიციენტები მოიპოვეს, რაც კანონდარღვევად ვერანაირად ვერ ჩაითვლება. ამ პატარა ქუჩაზე აშენებული კორპუსების მომიჯნავე განაშენიანებამ მკვეთრი „ინფლაცია“ განიცადა, რადგან მცხეთის ქუჩამ, რომელიც ერთ-ერთ საუკეთესო საცხოვრებელ ადგილად ითვლებოდა, დღეს დაკარგა ღირებულება – მუდმივი საცობები, პრობლემური საინჟინრო კომუნიკაციები, ჩაკლული რეკრეაცია. მცხეთის ქუჩა აღარ არის ისეთი პრესტიჟული, როგორც დღემდე იყო. ის სახლები, რომელიც მანამდე აშენდა (ვიდრე K2 რბოლა დაიწყებოდა) ამ ქუჩაზე და სადაც ხალხი ცხოვრობს, გაიაფდა, დეკაპიტალიზაცია განიცადა. ანუ რეალურად ვინც იქ მანამდე ცხოვრობდა, გაღარიბდა. აქ მნიშვნელოვანია პროპორცია – ახალი სახლები, ალბათ, მაქსიმუმ 25-35% იქნება იმ რაოდენობის, რაც მანამდე იყო აშენებული. შესაბამისად, იქ არსებული ბინების 65-75%-ის ღირებულება შემცირდა ახალ სახლებზე K2-ის მომატებით.

„ეს იწვევს მიწის ფასის არასტაბილურობას და, ასევე, არასამართლიანობის განცდას. არ შეიძლება, გამონაკლისის სახითაც კი, კოეფიციენტის გადამეტება. როცა ეს გამონაკლისი დაშვებულია, ყველა ცდილობს, ამით ისარგებლოს. დარწმუნებული ვარ, მერთან შესული ზარების 70% ამ მიზანს ემსახურება. გადამეტება უნდა აიკრძალოს და სიტუაციაც დალაგდება“, – აცხადებს კომპანია „არსის“ აღმასრულებელი დირექტორი თორნიკე აბულაძე.

მანამდე, „არსის“ აღმასრულებელი დირექტორი მოითხოვდა, რომ კანონით ზუსტად ისევე მკაცრად და კონკრეტულად განისაზღვროს კოეფიციენტის ზღვრული ნორმები, როგორც, მაგალითად, დღგ. „დღეს ხომ წარმოუდგენლად მიგვაჩნია, რომ ესა თუ ის მეწარმე მივიდეს ფინანსთა მინისტრთან და სთხოვოს, დღგ-ის განაკვეთი 18%-ის ნაცვლად, 5%-მდე დაუწიოს?! ან საშემოსავლო – 20-ის ნაცვლად 2%-მდე?! ზუსტად ასე უნდა იყოს კოეფიციენტიც, რომ თავში აზრადაც არავის მოუვიდეს მისი გაზრდის მცდელობა“, – აცხადებს თორნიკე აბულაძე.

თბილისში კოეფიციენტი K2 უბნების მიხედვითაა დიფერენცირებული.