1 კგ-ზე მეტი ნარკოტიკი საქართველოში უკანა ტანით შემოიტანეს - სკანდალური საქმე, რომელსაც შსს-ს მაღალჩინოსანი მფარველობდა
თბილისის საერთაშორისო აეროპორტში სამართალდამცველებმა მოქალაქე კონსტანტინე მებუკე დააკავეს, რომელსაც 1 კგ-ზე მეტი ნარკოტიკული საშუალება შემოჰქონდა. ნარკობიზნესის სკანდალური საქმის შესახებ „პრაიმტაიმი“ წერს.
გამოცემის ინფორმაციით, ნარკოტიკული საშუალების აღმოჩენის შემდეგ გამოძიება კვალმა კრიმინალური პოლიციის დეპარტამენტის მაღალჩინოსანთან, გოგა გელაშვილთან მიიყვანა.
გელაშვილი 2015 წლიდან ნარკოტიკებთან ბრძოლის განყოფილების უფროსის მოადგილე იყო.
გამოძიებით ირკვევა, რომ ქვეყანაში განსაკუთრებით დიდი ოდენობით ნარკოტიკების შემოტანის ფარული გეგმა შსს-ს მაღალჩინოსნის, გოგა გელაშვილის სიძემ, გიორგი ბახტაძემ შეიმუშავა, რაშიც სამსახურებრივი მდგომარეობიდან გამომდინარე აქტიურად იყო ჩართული თავად გელაშვილიც. ბრალდების დადგენილებაში აღნიშნულია, რომ ბახტაძემ მებუკეს გადასცა თანხა, რომლითაც ის საზღვარგარეთ დიდი ოდენობით ნარკოტიკს შეიძენდა. ასევე, ბახტაძემ დაფარა მისი ტრანსპორტირების ხარჯები. შსს-ს მაღალჩინოსანი გოგა გელაშვილი კი მათ დაჰპირდა, რომ უსაფრთხო გადაადგილებისთვის საჭირო ინფორმაციას მოიძიებდა.
გეგმის შესაბამისად, კონსტანტინე მებუკე გიორგი ბახტაძის დაფინანსებით გაემგზავრა გერმანიაში, სადაც უკანონოდ შეიძინა განსაკუთრებით დიდი ოდენობით - 1,3823 გრამი ბუპრენორფინის შემცველი ტაბლეტები (სუბოტექსი) და ტაბლეტის ნატეხები, რაც თბილისის საერთაშორისო აეროპორტის გამოვლით ღამის საათებში, ფარულად, უკანა ტანით უკანონოდ შემოიტანა საქართველოში.
"პრაიმტაიმის" ინფორმაციით, ნარკოტიკების შემოტანის ფაქტთან დაკავშირებით გამოძიების დაწყების შესახებ, სამსახურებრივი მდგომარეობიდან გამომდინარე, ცნობილი გახდა გოგა გელაშვილისთვის, რომელმაც თავის სიძეს, გიორგი ბახტაძეს შეატყობინა კონსტანტინე მებუკეს დანაშაულში მხილების შესახებ და „ვაიბერში“ მისწერა, არ დახვედროდა მას აეროპორტში.
შესაბამისი საგამოძიებო მოქმედებების ჩატარების შედეგად კონსტანტინე მებუკე თბილისის საერთაშორისო აეროპორტშივე დააკავეს. ის კომპიუტერულ ტომოგრაფიაზე „ნიუ ჰოსპიტალში“ გადაიყვანეს, სადაც უკანა ტანში გადამალული ნარკოტიკული საშუალება აღმოაჩნდა. მებუკეს სხეულიდან გამოდევნის შედეგად „სუბოტექსის“ საერთო ოდენობამ 1,3823 გრამი შეადგინა.
როგორც წესი, დაკავებულები მაშინვე ადვოკატს ითხოვენ ხოლმე, თუმცა ამ შემთხვევაში სხვაგვარად მოხდა. დაკავების შემდეგ პირველი, რაც მებუკემ მოითხოვა, შსს-ს მაღალჩინოსან გოგა გელაშვილთან შეხვედრა იყო, ეს შეხვედრა შედგა, რის შემდეგაც სამართალდამცველებისთვის უკვე ნათელი გახდა, რომ ნარკობიზნესს შსს-დან სწორედ გოგა გელაშვილი მფარველობდა. თავად მებუკემ კი მოსალოდნელი მკაცრი სასჯელის თავიდან ასაცილებლად გამოძიებასთან თანამშრომლობა გადაწყვიტა. მან ჩვენება შსს-ს მაღალჩინოსნისა და მისი სიძის წინააღმდეგ მისცა.
გელაშვილის ჩვენებით კი ირკვევა, რომ ეს ნარკოტიკების შემოტანის პირველი შემთვევა არ ყოფილა, მან გამოძიებას სხვა ფაქტების შესახებაც უამბო. მაგალითად, გელაშვილი საკუთარ ჩვენებაში აღწერს, როგორ დახვდნენ ის და გიორგი ბახტაძე თბილისის საერთაშორისო აეროპორტში კონსტანტინე მებუკეს, რომელიც აეროპორტიდან ბახტაძის კუთვნილ ბინაში მიიყვანეს და პრეზერვატივებში გახვეული ნარკოტიკები სარეალიზაციოდ გაამზადეს.
გახარიას უწყების ინფორმაციით, მიმდინარე წელს შსს-მ 143 ნარკორეალიზატორი დააკავა. 2018 წლის იანვრიდან დღემდე უკანონო ბრუნვიდან მილიონობით ნარკოტიკული საშუალება ამოიღეს, რაც ათობით ათას ადამიანს შეეძლო, მოეხმარა.