"ფეირის" ბოთლით იაფფასიანი სარეცხი საშუალებები იყიდებოდა - საგამოძიებო სამსახური

თბილისში, კუსტარულად მოწყობილ საამქროში "ფეირის" ბოთლებში უხარისხო სარეცხ საშუალებას ასხამდნენ, სხვისი სასაქონლო ნიშნის მართლსაწინააღმდეგო გამოყენების ფაქტი ფინანსთა სამინისტროს საგამოძიებო სამსახურის თანამშრომლებმა გამოავლინეს.

უწყების ცნობით, გამოძიებით დადგინდა, რომ სარეცხი საშუალებების რეალიზატორი ერთ-ერთი კომპანიის ხელმძღვანელი, უკანონო მატერიალური სარგებლის მიღების მიზნით „ფეირის“ სამარკო ნიშნით იაფფასიანი სარეცხი საშუალებს ასხამდა და საქართველოს მასშტაბით ყიდდა.

საგამოძიებო მოქმედებების შედეგად ამოღებულია სხვისი სასაქონლო ნიშნის გამოყენებით დამზადებული 8 943 ბოთლი „ფეირი“ და დიდი ოდენობით შესაფუთი მასალა - ბოთლები და ეტიკეტები.

გამოძიება მიმდინარეობს საქართველოს სისხლის სამართლის კოდექსის 196-ე მუხლის პირველი ნაწილით, რაც სასჯელის სახით ითვალისწინებს თავისუფლების აღკვეთას 2 წლამდე ვადით.