"უშენოდ სიცოცხლეს აზრი ვერ მოვუძებნე მამი ამ დაწყევლილ ქვეყანაში..." - ხორავას ქუჩაზე მომხდარი მკვლელობიდან 1 წელი გავიდა

ხორავას ქუჩაზე მოკლული დავით სარალიძის მამა, ზაზა სარალიძე ტრაგიკული შემთხვევიდან ერთი წლის თავზე, შვილს ემოციურ პოსტს უძღვნის. მიმართვა სარალიძემ "ფეისბუქის" პირად გვერდზე დაწერა:

"ერთი წელი გავიდა იმ დაწყევლილი დღიდან მამი, როცა ბოლოჯერ ვილაპარაკეთ, მას მერე შენი ხმა აღარ გამიგონია, მას მერე ყოველდღე გეძებ შენს ოთახში, ყოველ დღე გეძებ, მაგრამ მხოლოდ შენს ფოტოებს და ნივთებს ვაწყდები ყველგან, მას შემდეგ... შენთან ერთად დაიმარხა და დასამარდა ყველაფერი რაც მახარებდა. იმ დაწყევლილ დღეს ჩაქრა შენი სიცოცხლე და თან წაიღე ჩვენიც...

ერთი წელი გავიდა მამი და შენი მკვლელები საქართველოს ხელისუფლებამ შეიფარა, ხელისუფლებამ დღეს შენი სახელის გადათელვა გადაწყვიტა, მაგრამ დაავიწყდათ რომ მე შენთან ვარ და შენი სახელისთვის მზად ვარ ჩემი თავი შენ გაჩუქო. შენთან ერთად გაქრა 2017 წლის 1 დეკემბერს ის საქართველო, რომელმაც შენ გაგწირა.

იხილეთ ვიდეო: სარალიძის ემოციური კომენტარი იმ ფარდულთან, სადაც 1 წლის წინ, მისი შვილი მოკლეს - "ზუსტად ამ ადგილზე, სადაც სული დალია, პირობას ვდებ..."

პირობას გაძლევ მამი, არ შევარჩენ არავის შენი სახელის შელახვას - ან ჩემი თვალით ვნახავ ყველას განადგურებას ან შენთან მოვალ ძალიან მალე. უშენოდ სიცოცხლეს აზრი ვერ მოვუძებნე მამი ამ დაწყევლილ ქვეყანაში.

მიყვარხარ და მენატრები მამი. უფალმა დაგიმკვიდროს სასუფეველი და მე მალე მანახოს გზა რომელიც შენამდე მოდის" - წერს ზაზა სარალიძე.

ხორავას ქუჩაზე შემზარავი მკვლელობა 2017 წლის პირველ დეკემბერს მოხდა. მოზარდების ჩხუბის დროს ორი არასრულწლოვანი - ლევან დადუნაშვილი და დავით სარალიძე დაიჭრნენ. დადუნაშვილი ადგილზე გარდაიცვალა, სარალიძე კი მეორე დღეს საავადმყოფოში დაიღუპა.