ირინა შეიკი და ბრედლი კუპერი დაშორდნენ

4-წლიანი ურთიერთობის შემდეგ ბრედლი კუპერი და ირინა შეიკი დაშორდნენ, ინფორმაციას People ავრცელებს.

44 წლის კუპერმა და 33 წლის შეიკმა გადაწყვიტეს, ოფიციალურად დაშორებოდნენ და ახლა ცდილობენ, თანაბრად გადაინაწილონ მეურვეობა შვილზე, ლეა დე სეინზე, რომელიც 2017 წელს დაიბადა. მათი წარმომადგენლები მედიასთან კომენტარს არ აკეთებენ.

ბრედლი და ირინა 2015 წლიდან იყვნენ ერთად, ურთიერთობაზე საუბრისგან ყოველთვის თავს იკავებდნენ. 2019 წლის თებერვალში შეიკმა გამოცემასთან Glamour UK განაცხადა, რომ სურდა, საკუთარი სასიყვარულო ურთიერთობა საჯარო განხილვის საგანი არ ყოფილიყო.

VIDEO : დაშორების შემდეგ ირინა შეიკმა ბრედლი კუპერის სახლი ჩემოდნებით დატოვა

„უამრავი მეგობარი მყავს, რომლებიც პირადი ცხოვრების შესახებ ხშირად პოსტავენ სოციალურ ქსელებში. ეს ძალიან მომწონს, მაგრამ მაინც მგონია, რომ ყველაფერი პირად არჩევანზეა დამოკიდებული,“ - განაცხადა ირინამ.

გასული წელი კუპერისთვის ძალიან მნიშვნელოვანი იყო, ეკრანებზე გამოვიდა მისი ფილმი „ვარსკვლავის დაბადება“, რომელიც ოსკარის 8 კატეგორიაში იყო ნომინირებული. თუმცა ფილმის გამოსვლისა და განსაკუთრებით, ოსკარის ცერემონიალზე ლედი გაგასთან ერთად შესრულებული სიმღერის შემდეგ, კუპერისა და შეიკის ურთიერთობა მსოფლიოს განხილვის საგანი გახდა. რომანტიკული სიმღერა მსახიობებმა იმდენად ვნებიანად შეასრულეს, რომ თითქმის ყველა დარწმუნებული იყო, ლედი გაგასა და ბრედლი კუპერს ბევრად მეტი აკავშირებდათ, ვიდრე მეგობრობა. თუმცა რომანის შესახებ ინფორმაცია ორივე მათგანმა უარყო.