ბოლო ცნობები  რუსთაველიდან, სადაც აქციის მონაწილეები პარლამენტის შესასვლელთან მისვლას ცდილობენ

პარლამენტთან მიმდინარე საპროტესტო აქციის მონაწილეები და ოპოზიციის წარმომადგენლები, ჭიჭინაძის ქუჩის მხრიდან პარლამენტის შესასვლელთან მისვლას ცდილობენ, თუმცა მათ ამის საშუალებას ადგილზე მობილიზებული პოლიცია არ აძლევს.

გაერთიანებული ოპოზიციის ერთ-ერთმა ლიდერმა გიორგი ვაშაძემ განმარტებები მოსთხოვა შსს-ს საპატრულო პოლიციის დეპარტამენტის დირექტორის მოადგილეს, კახა ბუხრაძეს, თუ რატომ არ აძლევს პოლიცია აქციის მონაწილეებს ტროტუარზე გავლისა და პარლამენტის შესასვლელთან მისვლის საშუალებას. შსს-ს წარმომადგენელმა აღნიშნა, რომ აქციის მონაწილეებს პროტესტის გამოხატვის უფლება აქვთ, თუმცა ეს კანონის ფარგლებში უნდა მოექცეს.

ამ დროისთვის, ჭიჭინაძის ქუჩაზე "რობოკოპები" აღარ იმყოფებიან. პარლამენტის შესასვლელთან პოლიციაა მობილიზებული.