რა მდგომარეობაა ავტობუსებში მას შემდეგ, რაც "მარშრუტკების" მოძრაობა აიკრძალა - "აქ ერთმეტრიანი დისტანცია როგორ დავიცვათ?"

მეტროსადგურებსა და ავტობუსებში მგზავრთნაკადმა საგრძნობლად მოიმატა. ამას ის ფოტო და ვიდეოკადრები ადასტურებს, რომელიც თბილისის ქუჩებშია გადაღებული.

შეგახსენებთ, გუშინ მთავრობამ მიიღო გადაწყვეტილება და 18 მარტიდან ქვეყანაში სამარშრუტო ტაქსებით მოძრაობა აიკრძალა.

"ყველაფერი, ყველაფერი, მაგრამ აქ ერთმეტრიანი დისტანცია როგორ დავიცვათ, ხომ ვერ მეტყვით?" - წერს ინტერნეტმომხმარებელი მირანდა ჭარხალაშვილი და დღეს ერთ-ერთ ავტობუსში გადაღებულ ვიდეოს ავრცელებს.

ავტობუსებში ხალხმრავლობის ამსახველ ფოტოებს ავრცელებს ექსპერტი არჩილ გამზარდიაც და წერს, რომ მთავრობას "სულ უნდოდა მიკროავტობუსების აკრძალვა და ახლა დრო იხელთეს, ამ დროს ავტობუსები არც საკმარისია და არც დაცული" - წერს გამზარდია და ფოტოებს ავრცელებს.

სასწრაფო ზომების მიღებისკენ მოუწოდებს ხელისუფლებას საქართველოს ტრანსპორტისა და გზების ასოციაციის ხელმძღვანელი დავით მესხიშვილი:

"სასწრაფოდ დააბრუნეთ ყვითელი მარშუტკები, სასწრაფოდ! ახსნაც არ არის საჭირო რატომ. იმის მაგივრად ტრანსპორტი დაგემატებინათ, რომ სიხალვათე ყოფილიყო ტრანსპორტში, როგორ აკრძალეთ? ტრანსპორტის სამსახური რას აკეთებთ საერთოდ ჭკუაზე თუ ხართ?!" - წერს მესხიშვილი და დასძენს, რომ ვირუსის გავრცელების ყველაზე მაღალი რისკი ახლა სწორედ მუნიციპალურ და საქალაქთაშორისო ტრანსპორტშია.

სამარშრუტო ტაქსების მოძრაობის აკრძალვაზე მთავრობის გადაწყვეტილება როგორც თბილისს, ისე რეგიონებსა და საქალაქთაშორისო სამარშრუტო ტაქსებს ეხება.

"დღეს ფაქტობრივად გადავდივართ ვირუსის გავრცელების ეტაპზე, რაც ნიშნავს, რომ რაოდენობა გაგვეზრდება. ეპიდემიის შეჩერების ეტაპიდან გადავდივართ გავრცელების ეტაპზე...

საბჭოს სხდომის ფარგლებში იქნა გადაწყვეტილება მიღებული და აიკრძალება სამარშრუტო ტაქსების მოძრაობა. ეს არის ერთ-ერთი ყველაზე მნიშვნელოვანი გავრცელების კერა, ამიტომ ეს გადაწყვეტილება იქნა მიღებული. დარჩება ქალაქში მერიის ტრანსპორტი, ისევე როგორც მეტრო, მაგრამ მათ დაევალათ და ექნებათ ვალდებულება, ყოველდღიურად მოახდინონ ამ ტრანსპორტის დეზინფიცირება და შესაბამისად, აქ რისკების მართვა უკეთ შეგვიძლია“, - განაცხადა გახარიამ აღნიშნული ინფორმაციის გაჟღერებისას.