"გეფას" დირექტორი, რომელსაც კორონავირუსზე 2 თვე მკურნალობდნენ, გამოჯანმრთელდა

ინფექციური საავადმყოფოს სამედიცინო დირექტორის, მარინა ეზუგბაიას განცხადებით, პირველ ხუთეულში შემავალი პაციენტი, რომელიც კორონავირუსზე დღემდე დადებითი იყო, გამოჯანმრთელდა. ამის შესახებ ეზუგბაიამ ჟურნალისტებს განუცხადა.

ცნობისთვის, #5 პაციენტი "გეფას" დირექტორია, რომელსაც კორონავირუსი 4 მარტს დაუდასტურდა და ინფექციურ საავადმყოფოში 5 მარტიდან იყო მოთავსებული. მას დაავადების არანაირი სიმპტომი აღარ აღენიშნებოდა, თუმცა ტესტი ამ დრომდე ინფექციაზე დადებით შედეგს აჩვენებდა, შესაბამისად მისი კლინიკიდან გაწერა ვერ შეძლეს. დღეს კი ის საავადმყოფოდან გაეწერება და ყველა სხვა პაციენტის მსგავსად ორკვირიან იზოლაციაში გადავა.

"გეფას" დირექტორისგან ვირუსი მის რამდენიმე თანამშრომელს გადაედო, მათ შორის სს საქართველოს ჯანდაცვის ჯგუფის გენერალურ დირექტორს ნიკა გამყრელიძეს, რომელიც საავადმყოფოდან თითქმის ერთთვიანი მკურნალობის შემდეგ გამოეწერა.

როგორც გამყრელიძემ ერთ-ერთ ინტერვიუში აღნიშნა, "გეფას" დირექტორმა ძალიან დიდი სტრესი გადაიტანა, რადგან მის გამო რამდენიმე ადამიანი დასნეულდა:

"ძალიან განიცდიდა ისიც ამ ყველაფერს. როგორც ვიცი, მასთან ვირუსი უსიმპტომოდ მიმდინარეობს, უბრალოდ ტესტზე ამოდის სუსტად დადებით პასუხი, თითქმის ორი თვეა ასეა. საკმაოდ დიდი სტრესი ჰქონდა, რადგან აღიქვამდა, რომ ეს მის გამო მოხდა. დანაშაულის განცდა ჰქონდა, თუმცა მანაც არ იცოდა, რომ ის იყო დაინფიცირებული" - აღნიშნა გამყრელიძემ "ტვ პირველის" ეთერში.