"ერთი წელია ჩემთვის ყველაფერი სულერთია, რა სინდისით გძინავთ მშვიდად?!" - ექსკურსიაზე გარდაცვლილი გოგონას დედა პროკურატურის გადაწყვეტილებაზე

2019 წლის მაისში, სკოლის ექსკურსიაზე მყოფი გოგონას - სოფო ნიკოლეიშვილის გარდაცვალების საქმეზე, საქართველოს პროკურატურამ ბრალი სკოლის ორ პედაგოგს წარუდგინა.

გამოძიებით დადგინდა, რომ 2019 წლის 26 მაისს მომხდარ შემთხვევაში, სკოლა "ალბიონის" ორი პედაგოგის - ნ.ს-ს და ვ.ქ.-ს ბრალეულობა დადგინდა და მათ ბრალდება წარედგინათ გულგრილობის ფაქტზე, რამაც ადამიანის სიცოცხლის მოსპობა გამოიწვია.

ბრალდება სასჯელის სახედ ითვალისწინებს თავისუფლების აღკვეთას 2-დან 5 წლამდე ვადით.

პროკურატურის გადაწყვეტილებას "ფეისბუქზე" ეხმაურება გარდაცვლილი გოგონას დედა ლანა ნიკოლეიშვილი:

"დიახ, ყველა პედაგოგმა იცოდეს,რამხელა პასუხისმგებლობაა, როცა სხვისი შვილების სადმე წაყვანას დაგეგმავს!აწი და ერთი წელია ჩემთვის ყველა და ყველაფერი სულერთია, გარდა იმისა,შვილი რომ ჩაგაბარეთ, ჩემი ხელით რომ ჩაგისვით ავტობუსში, უკან რატომ არ მომიყვანეთ და რა სინდისით გძინავთ ამ ხნის მანძილზე მშვიდად?!" - წერს ლანა ნიკოლეიშვილი.