"შაქარ, ზეცაში აუცილებლად შევხვდებით... სულ შენ გეძებ, სულ შენზე ვფიქრობ" - რას წერდა ძმის მიერ მოკლული ფეხბურთელი შაქარაშვილზე?

მთელი ქვეყანა შეძრა თბილისში მომხდარმა ტრაგედიამ. დღის პირველ ნახევარში გავრცელდა ინფორმაცია, რომ ძმამ ძმას სასიკვდილო ჭრილობა მიაყენა. გარდაცვლილი ახალგაზრდა 19 წლის მიშო ახლოურია, რომელიც "საბურთალოს" ფეხბურთელი იყო. იმავე გუნდის, სადაც რამდენიმე თვის წინ მოკლული გიორგი შაქარაშვილი თამაშობდა.

ისინი ერთმანეთის ახლო მეგობრები იყვნენ. მიშო ახლოურის "ფეისბუქიდან" ირკვევა, რომ თვეების წინ მეგობრისა და თანაგუნდელის მკვლელობა მძიმედ გადაიტანა. გიორგი შაქარაშვილზე მას უამრავი ემოციური პოსტი უწერია. ყველაზე მძიმე მათ შორის ივლისში გამოქვეყნებული სტატუსია, სადაც მიშო გარდაცვლილ მეგობარს მიმართავს:

"შაქარ მენატრები, ძალიან მენატრები, როგორი რთულია უშენობა. როგორი რთულია იმაზე ფიქრი, რომ ვეღარ შეგხვდები ამ დედამიწაზე, მიუხედავად იმისა, რომ სულ შენ გეძებ, სულ შენზე ვფიქრობ. ძალიან მიყვარხარ, ერთი იმაზე ფიქრი მაძიერებს, რომ ახლა უკეთეს ადგილას ხარ და ზემოდან გვიყურებ. ჩემი ანგელოზი ხარ შაქარ. ზეცაში აუცილებლად შევხვდებით და იქ მოგვიწევს იმის გაკეთება, რაც ამ უსამართლო ცხოვრებამ არ გვაცადა" - წერდა მიშო ახლოური.

ცნობისთვის, სასიკვდილო ჭრილობები მიშო ახლოურს 21 წლის ძმამ მიაყენა. ოფიციალური ინფორმაციით, მიზეზი ურთიერთშელაპარაკებაა.

"გამოძიებით დადგინდა, რომ ბრალდებულმა ძმას - 2001 წელს დაბადებულ მ.ა.-ს, ურთიერთშელაპარაკების ნიადაგზე, ცივი იარაღის გამოყენებით სხეულზე ჭრილობა მიაყენა. დაჭრილი მამაკაცი სასწრაფო სამედიცინო დახმარების ჯგუფმა საავადმყოფოში გადაიყვანა, თუმცა მისი გადარჩენა ვეღარ მოხერხდა.

სამართალდამცველებმა დანაშაულის ჩადენის იარაღი - დანა ნივთმტკიცებად ამოიღეს.

ოჯახის წევრის მიმართ ჩადენილ განზრახ მკვლელობის ფაქტზე გამოძიება საქართველოს სსკ-ის 11 პრიმა-108-ე მუხლით მიმდინარეობს“,- ნათქვამია შსს-ს ინფორმაციაში.