"წადით და ჩაიტარეთ ვაქცინაცია. ის მუშაობს" - ისრაელში, ვაქცინაციის შედეგად, 60 წელს გადაცილებულ მოსახლეობაში კოვიდით ინფიცირების შემთხვევები განახევრდა

ისრაელის პრემიერ-მინისტრის, ბენიამინ ნეთანიაჰუს განცხადებით, კორონავირუსის საწინააღმდეგო ვაქცინაციის შედეგად, ბოლო ორი კვირის განმავლობაში, 60 წელს გადაცილებულ ასაკობრივ ჯგუფში ინფიცირების შემთხვევები თითქმის განახევრდა და ამავე ჯგუფში სერიოზული შემთხვევების რიცხვი მეოთხედზე მეტით შემცირდა.

„გასულ 16 დღეში, მძიმე შემთხვევების ჰოსპიტალიზებულთა რიცხვი 26%-ით შემცირდა და დაახლოებით 45%-იანი კლებაა ახალ შემთხვევებში. ეს არის ვაქცინაციის პირდაპირი შედეგი. წადით და ჩაიტარეთ ვაქცინაცია. ის მუშაობს. თუ აიცრებით, შევძლებთ თანდათან გამოვიდეთ შეზღუდვებიდან და გავხსნათ ეკონომიკა“, - აღნიშნა ნეთანიაჰუმ.

ნეთანიაჰუს განმარტებით, ქვეყანაში კოვიდ -19-ით გარდაცვალების თითქმის 5 000 შემთხვევიდან 95% 60 წელს გადაცილებულ ადამიანებზე მოდის. ჯანდაცვის სამინისტროს მონაცემებით, ამ დროისთვის 60 წელს გადაცილებულ მოსახლეობაში ვაქცინაცია უკვე 84%-ს ჩაუტარდა. ისრაელმა ვაქცინაციის პროგრამა გასული წლის დეკემბრის ბოლოს დაიწყო და ამ დროისთვის მოსახლეობის 35%-ია აცრილი. მთავრობა მიზნად ისახავს, მარტისთვის აცრა მოსახლეობის 50%-ს ჩაუტარდეს.