"დავრჩით ერთის გამოტოვებით, როგორ ვიყოთ? გაუსაძლისია, ღმერთო" - რას წერს ეკატერინე ტოგონიძე ნინო შუბლაძის დის გარდაცვალებაზე

მწერალი ეკატერინე ტოგონიძე ჟურნალისტ ნინო შუბლაძეს დის გარდაცვალებას ემოციური პოსტით უსამძიმრებს:

"გათენდა და არ ყოფილა სიზმარი. სოფო არ არის, მზეა... ვიცი, ამ დროს როგორც წვავს ისედაც გაგლეჯილ გულს კარგი ამინდი. სოფოს ამინდი სოფოს გარეშე.

აქ ყველა სოფოზე ლაპარაკობს, იმდენს ყვებიან, ყველგან სოფოს ხმა მესმის, სადაც გავიხედავ, სოფოს ღიმილს ვხედავ. გაუსაძლისია, ღმერთო.

“ისე იცხოვრე, თითქოს ეს შენი ბოლო დღეა” - ბელეტრისტიკაა, აბა რა არის? მაგრამ ჩვენში იყო ადამიანი, რომელმაც შეძლო და შეუძლებელი სინამდვილედ აქცია. ასე იცხოვრა. ძალდაუტანებლად, უბრალოდ, დაუმადლებლად ასე. არ ვიცი, როგორ... არ ვიცი, საიდან. რა უძირო უნდა იყოს ადამიანის გული, რომ ამდენი დაიტიოს. წმინდა წყლის სიყვარული და სიკეთე, ყოველგვარი მინარევის გარეშე. უზღვავი, ყველას სამყოფი, თავდადებული, დაუღალავი, ყოველდღიურად უხვად გადმოფრქვეული და მაინც ულევი.

ანო, ჩემო პატარავ, რა ტრიალებს ახლა შენს გულში.... ნინო, დავრჩით ერთის გამოტოვებით, როგორ ვიყოთ? ღმერთო, რით ვანუგეშოთ მშობლები? ან შენ რა გითხრა, ნინო? ვტირი თქვენთან ერთად, ვტირი სოფოს, თქვენ ან იქნებ ყველაზე მეტად საკუთარ თავს, რომელსაც აი ასე გამოეცალა სიყვარული, საყრდენი, დღესასწაული. სამყარო - სახელად სოფო".

"რუსთავი 2"-ის საინფორმაციო სამსახურის უფროსი ნინო შუბლაძის და, ქართულ-ამერიკული უნივერსიტეტის ერთ-ერთი დამფუძნებელი, არასამთავრობო ორგანიზაცია "პარტნიორები საქართველოს" დირექტორი, ტრენერი სოფო შუბლაძე კორონავირუსით გამოწვეული გართულების შედეგად გუშინ საავადმყოფოში გარდაიცვალა.

ცნობისთვის, მწერალ ეკატერინე ტოგონიძის მეუღლე ყოფილი დეპუტატი, რატი სამყურაშვილი მძიმე დაავადებასთან, გლიობლასტომასთან ხანგრძლივი ბრძოლის შემდეგ, 2020 წლის 6 აპრილს, 42 წლის ასაკში გარდაიცვალა. რატი სამყურაშვილი და მწერალი ეკატერინე ტოგონიძე 15 წელი იყვნენ ქორწინებაში.