"მამამ ვერ გადაიტანა... ჩემი ორივე ფილტვი იყო 81%-ით დაკეტილი, რამდენჯერმე დავიხრჩე უჰაერობით" - გიორგი ფანცულაია მძიმე კოვიდგამოცდილებაზე

ადვოკატი გიორგი ფანცულაია და მთელი მისი ოჯახი კოვიდინფიცირებულები იყვნენ, რასაც მისი მამა ემსხვერპლა. როგორც ტელეკომპანია "რუსთავი 2"-ის , გადაცემა "ღამის კურიერის" ეთერში იხსენებს, თვითონაც ძალიან მძიმედ იყო და ლევან რატიანის დამსახურებაა, ის რომ დღეს ცოცხალია:

"ამ დაავადების საშინელება და ქარტეხილი რაც არის, გავიარეთ ჩემმა ოჯახმა. მე, მამა, დედა, მეუღლე, ბავშვი, ყველანი ერთობლივად ვიყავით კოვიდინფიცირებული, სამწუხაროდ მამამ ვერ გადაიტანა.

ვერაგი დაავადებაა, ის კლინიკაში დამძიმდა. რაც შემეხება მე, ამას არ ვამბობ სადღეგრძელოდ, გულწრფელად ვამბობ, რომ ჩემი მდგომარეობა იყო იმდენად კრიტიკული, პირადად ლევან რატიანის დამსახურებაა, რომ დღეს თქვენს სტუდიაში ვარ.

ჩემი ორივე ფილტვი იყო 81%-ით დაკეტილი და მე ჩემს თავზე ვნახე, რა არის ამ ვერაგი დაავადების საშინელება, როგორც ფილმებში გვინახავს, როგორ იხრჩობა ადამიანი, ასე რამდენიმეჯერ დავიხრჩე უჰაერობით გონების დაკარგვამდე და შემდგომ მომაბრუნეს.

ყველას ვურჩევ გაიზიაროს, რომ ეს არის რეალობა და ეს რომ რეალობაა, მე ვარ მაგის მაგალითი" - აღნიშნა გიორგი ფანცულაიამ.