მხედრები, ლიმუზინი, ორკესტრი - თურქეთში ღარიბაშვილის დახვედრის პომპეზური ცერემონიის ამსახველი კადრები

საქართველოს პრემიერ-მინისტრი ოფიციალური ვიზიტით თურქეთში იმყოფებოდა. ირაკლი ღარიბაშვილის დახვედრის ოფიციალური ცერემონია თურქეთის პრეზიდენტის სასახლეში გაიმართა.

სასახლემდე ირაკლი ღარიბაშვილის ესკორტი ლიმუზინით მივიდა, ისინი მხედრებმა მიაცილეს. თურქეთის მთავრობა მსგავს პომპეზურ დახვედრებს სხვა ქვეყნის მაღალი რანგის წარმომადგენლებს უწყობს.

დახვედრის ცერემონიის შემდეგ, ირაკლი ღარიბაშვილის და რეჯეფ თაიფ ერდოღანის პირისპირ და გაფართოებულ ფორმატში შეხვედრები გაიმართა. ამის შემდეგ ერთობლივი განცხადებები გაკეთდა.

თურქეთის პრეზიდენტის შეფასებით, წლევანდელი წელი მნიშვნელოვანია იმ თვალსაზრისითაც, რომ ანკარაში საქართველოს დიპლომატიური წარმომადგენლობა 100 წლის წინ გაიხსნა და თან საქართველოს დამოუკიდებლობის 30 წლისთავია.

"თურქეთი უკვე 14 წელია, არის საქართველოს ნომერ პირველი სავაჭრო პარტნიორი. მიუხედავად იმისა, რომ 2020 წელს მცირედი კლება იყო სავაჭრო მოცულობაში, ჩვენ მიზნად დავისახეთ, უმოკლეს დროში სავაჭრო მოცულობის მაჩვენებელი 3 მილიარდ დოლარამდე გავზარდოთ. თავისუფალი სავაჭრო შეთანხმების გაფართოების მიმართულებითაც მიმდინარეობს მოლაპარაკებები და კონსულტაციები. ამასთანავე, მტკიცედ ვმუშაობთ ჩვენს სავაჭრო პოტენციალის გაზრდისთვის და ამ კუთხით საბაჟო მიმართულებით თანამშრომლობის გაფართოებაზე. როგორც ენერგეტიკის სფეროში, ასევე ყველა სხვა სფეროში საქართველოში განხორციელებულია თურქული ინვესტიციები, რომლის მოცულობა 214 მილიონი აშშ დოლარია. ჩვენ საქართველოსთან გვაქვს დიდი მნიშვნელოვანი პროექტები განხორციელებული, რომელიც მთლიანად რეგიონს უცვლის სახეს. ერთ-ერთი ასეთია სტრატეგიული პროექტი სამხრეთის გაზის დერეფანი, რომელზეც ჩვენ ეს პლატფორმა შევქმენით. დამაკავშირებელი მექანიზმებისა და სხვადასხვა კომბინირებული დერეფნების საშუალებით, ჩვენ წამოწყებული გვაქვს მრავალმხრივი თანამშრომლობა“, - აღნიშნა რეჯეფ თაიფ ერდოღანმა.

ირაკლი ღარიბაშვილის სახელმწიფო ვიზიტი თურქეთის რესპუბლიკაში გუშინვე დასრულდა. შეხვედრების დასრულების შემდეგ, ირაკლი ღარიბაშვილი თურქეთის რესპუბლიკის პრეზიდენტმა რეჯეფ თაიფ ერდოღანმა გააცილა.