კრისტიან ერიქსენს კარდიოსტიმულატორს ჩაუდგამენ - რას აცხადებს დანიის ნაკრების ექიმი?

CNN-ის გავრცელებული ინფორმაციით, დანიის ნაკრების ფეხბურთელს, კრისტიან ერიქსენს, რომელსაც რამდენიმე დღის წინ, ევროპის ჩემპიონატზე ფინეთთან მატჩისას მოულოდნელად გული გაუჩერდა, კარდიოსტიმულატორს ჩაუდგამენ.

როგორც გამოცემა დანიის ნაკრების მთავარი ექიმის ინფორმაციის თანახმად წერს, 29 წლის ფეხბურთელის გამოკვლევებმა აჩვენა, რომ მისთვის კარდიოსტიმულატორის ჩადგმა აუცილებელია.

“კრისტიანმა გადაწყვიტა პროცედურა ჩაიტაროს. ამავე აზრზე არიან დანიელი და უცხოელი ექიმები, რომლებმაც მისი კვლევების შედეგები შეისწავლეს. ეს მოწყობილობა აუცილებელია გულის გაჩერების გამო გამოწვეული გულის რიტმის დარღვევის მოსაწესრიგებლად. ყველას მოვუწოდებთ, პატივი სცენ კრისტიანისა და მისი ოჯახის სურვილს დარჩნენ მარტო”, - განაცხადა დანიის ნაკრების ექიმმა.

CNN-ის განმარტებითვე, კარდიოსტიმულატორი მცირე ზომის მოწყობილობაა, რომელიც ინერგება გულმკერდის არეში და მონიტორინგს უწევს გულის რიტმს.

მოწყობილობა გულს უკავშირდება და რიტმის დარღვევის შემთხვევაში ელექტრული შოკის ბიძგებს გულისკენ მიმართავს, რის შედეგადაც გულისცემა რეგულირდება.

შეგახსენებთ, რომ ევრო 2020-ზე, ფინეთისა და დანიის საფეხბურთო დაპირისპირების დროს, დანიელი ნახევარმცველი, კრისტიან ერიქსენი მოულოდნელად ცუდად გახდა, ის მინდორზე წაიქცა და 13 წუთის განმავლობაში უგონო მდგომარეობაში იყო.

მოგვიანებით ფეხბურთელი კლინიკაში გადაიყვანეს. კრისტიანის ექიმმა დაადასტურა, რომ მას მოედანზე გული გაუჩერდა, თუმცა სწრაფი რეაგირების შედეგად და დეფიბრილატორის გამოყენებით, გული აუმუშავეს.

• იხილეთ ასევე: კრისტიან ერიქსენი კლინიკიდან პირველ ფოტოს აქვეყნებს - რას წერს დანიელი ფეხბურთელი, რომელიც ფეხბურთის თამაშის დროს ცუდად გახდა