"მსჯავრდებულს კორონავირუსი დაუდასტურდა" - რას აცხადებენ პენიტენციურ სამსახურში დეკანოზ გიორგი მამალაძის სამოქალაქო კლინიკაში გადაყვანის შესახებ

სპეციალური პენიტენციური სამსახური დეკანოზ გიორგი მამალაძის სამოქალქო კლინიკაში გადაყვანასთან დაკავშირებით განცხადებას ავრცელებს, სადაც ნათქვამია, რომ მამალაძეს კორონავირუსი დაუდასტურდა, რის გამოც ის "ვივამედის" კლინიკაში მოათავსეს.

"სპეციალური პენიტენციური სამსახური: მსჯავრდებულ გ.მ-ს კოვიდ-19 დაუდასტურდა და შემდგომი დაკვირვების მიზნით, სამოქალაქო სექტორის კლინიკაში მოთავსდა საზოგადოების და მედიის მაღალი ინტერესის გათვალისწინებით გავმარტავთ, რომ მსჯავრდებული გ.მ. მე-18 (სამკურნალო) დაწესებულებიდან კლინიკა "ვივამედშია“ გადაყვანილი.

მას მიმდინარე წლის 13 ნოემბერს covid-19-ის დამახასიათებელი სიმპტომები გამოუვლინდა (რესპირატორული სიმპტომები,ტემპერატურის უმნიშვნელო მატება). მსჯავრდებულს ჩივილებიდან გამომდინარე ჩაუტარდა PCR ტესტირება და მას კოვიდ-19 დაუდასტურდა.

მსჯავრდებულის ჯანმრთელობის მდგომარეობა სტაბილურია, თუმცა შემდგომი დაკვირვების მიზნით, კლინიკა "ვივამედში“ მოთავსდა და მედპერსონალის მეთვალყურეობის ქვეშ იმყოფება", - ნათქვამია განცხადებაში.