თუ დედოფლობაზე ოცნებობდით, ეს ვაკანსია თქვენთვისაა - ინგლისის ერთ-ერთ კუნძულზე დედოფალს ეძებენ
ინგლისის ერთ-ერთი ყველაზე იზოლირებული, პიელის კუნძული ახალ მეფეს/დედოფალს ეძებს. ტიტულის მოსაპოვებლად ნებისმიერ ადამიანს შეუძლია ბრძოლა, მაგრამ უნდა იცოდნენ, რომ ამ პატივსაცემ პოზიციას თავისი დადებითი და უარყოფითი მხარეებიც ახლავს თან. ბარი - “The Ship Inn” პიელის კუნძულებზე მდებარეობს და მეფემ ამ ტურისტული თავშეყრის ადგილის მენეჯერობაც უნდა შეითავსოს.
ბაროუს დაბის საბჭოში ამბობენ, რომ ბარის მენეჯერის პოზიციაზე მუშაობას ბევრი დადებითი ფაქტორი ახლავს თან: გამაოგნებელი პეიზაჟი, უნიკალური ადგილმდებარეობა და ყველაზე უცნაური რამ, პიელის მეფის, ან დედოფლის წოდება.
ადგილობრივთა ტრადიციის მიხედვით, ვინც ბარის მენეჯერობას იტვირთავს, ის ხდება კუნძულის მმართველიც და სამეფო ტიტულის მიღების ცერემონიის იმიტაციაც ტარდება, რომლის დროსაც, მომავალი მეფე ძველებურ სავარძელში ჯდება ხმლით ხელში და მას ლუდს ასხამენ.
მაგრამ მეფის ტიტულს თავისი უარყოფითი მხარეც აქვს: ამინდის სისასტიკე და პიელის კუნძულის იზოლირებულობა, ალბათ ყველასთვის არ იქნება სახარბიელო. კუნძულზე მოხვედრა მხოლოდ ბორნითაა შესაძლებელი, რომელიც მხოლოდ ტურისტულ სეზონზე - აპრილიდან სექტემბრამდე მუშაობს.
ეს პოსტი მხოლოდ ტიტულით ტკბობას არ გულისხმობს და კუნძულის სილამაზის და მისი ბუნებრივი ჰაბიტატის შენარჩუნებასაც მოიცავს. საბჭო იმედოვნებს, რომ მომავალი წლისთვის უკვე არჩეული ეყოლებათ ახალი მმართველი, რათა აპრილში ტურისტული სეზონის დასაწყისს მომზადებულები შეხვდნენ
მოამზადა ანა სიბოშვილმა