ხმაური ორხევის დასახლებაში - მუნიციპალურმა ინსპექციამ სახლების დემონტაჟი დაიწყო
ორხევის დასახლებაში, სადაც მუნიციპალურმა ინსპექციამ სახლების დემონტაჟი დაიწყო, ხმაურია. ადგილზე იმყოფება საპატრულო პოლიცია. ადგილობრივები აცხადებენ, რომ მერიას ფართის დაკანონების მიზნით ადრე მიმართეს, თუმცა პროცედურა დროში გაიწელა და საბოლოო ჯამში, ფართი არ დაუკანონდათ.
როგორც ერთ-ერთი დაზარალებული განმარტავს, ახლა არ იცის, სად უნდა გაათენოს ღამე, მაშინ როდესაც ერთადერთი საცხოვრებელი ფართი დემონტაჟს დაექვემდებარა.
"შეშაზე ვიყავი წასული და როდესაც მოვედი, ასეთი ვითარება დამხვდა. ისეთს არაფერს ვითხოვ, მე და მამას დასარჩენი ფიზიკურად არსად გვაქვს. მნიშვნელობა არ აქვს სად, მაგრამ ან ქირით ან სადმე რომ მოვთავსდეთ. იმისაც არ ვითხოვ, რომ გინდა თუ არა აქ უნდა ვიცხოვრო, სადაც გინდა იქ იყოს, ოღონდ ერთი ოთახი რომ არსებობდეს იმისთვის, რომ მე და მამამ დავიძინოთ“, - აცხადებს "მთავარ არხთან“ საუბრისას ერთ-ერთი დაზარალებული.
მუნიციპალური ინსპექციის წარმომადგენლის განმარტებით, მათ იმ სახლების დემონტაჟი მოახდინეს, რომელშიც არავინ ცხოვრობდა. მისივე თქმით, ამის მტკიცებულებად ფოტო და ვიდეომასალაც გააჩნიათ.
"დღეს ჩვენ რომელი სახლის დემონტაჟებიც განვახორციელეთ, იქ შესახლებული არავინ იყო. ჩვენთვის ცნობილი არ არის რომ ისინი ადგილობრივები არიან ან სად არიან ჩაწერილები. თუმცა, იმისთვის, რომ ქუჩაში არავინ დარჩეს, მობილიზებულია მერია, მუნიციპალური სამსახური და გამგეობა. თუ ვინმე ქუჩაში დარჩება, მას საცხოვრისს გამოვუყოფთ“, - აცხადებს ინსპექციის წარმომადგენელი.