"აშშ-მა უსაფრთხოების გარანტიებზე გაგზავნილ წინადადებებზე რუსეთისგან პასუხი მიიღო" - რა განცხადებას ავრცელებს სახელმწიფო დეპარტამენტის წარმომადგენელი?
აშშ-მ დღეს მიიღო პასუხი რუსეთისგან მას შემდეგ, რაც შეერთებულმა შტატებმა სამი კვირის წინ რუსეთს უსაფრთხოების გარანტიებზე წინადადებებთან დაკავშირებით წერილობითი დოკუმენტი გადასცა.
ინფორმაციას CNN აშშ-ს სახელმწიფო დეპარტამენტის წარმომადგენლის განცხადებაზე დაყრდნობით ავრცელებს.
"ჩვენ შეგვიძლია დავადასტუროთ, რომ მივიღეთ პასუხი რუსეთის ფედერაციისგან. ის დღეს ელჩ სალივანს გადაეცა მოსკოვში", - განაცხადა სახელმწიფო დეპარტამენტის მაღალჩინოსანმა.
მანამდე რუსეთის საგარეო საქმეთა მინისტრმა სერგეი ლავროვმა იტალიელ კოლეგასთან შეხვედრის შემდეგ განაცხადა, რომ მოსკოვი აშშ-ს უსაფრთხოების გარანტიების შესახებ პასუხს დღეს გაგზავნიდა. რუსი დიპლომატის თქმით, მოსკოვი წერილს გაასაჯაროებს.