"მიუხედავად არსებული გამოწვევებისა და პროვოკაციებისა, ქვეყანაში შევინარჩუნებთ მშვიდობას... მოსახლეობა უნდა იყოს მშვიდად, ჩვენ არავითარი საფრთხე არ გვემუქრება" - პრემიერი

"მოსახლეობა უნდა იყოს მშვიდად, ჩვენ არავითარი საშიშროება და საფრთხე არ გვემუქრება" - ამის შესახებ პრემიერ-მინისტრმა ირაკლი ღარიბაშვილმა მთავრობის სხდომაზე განაცხადა.

პრემიერ-მინისტრის თქმით, მიუხედავად არსებული გამოწვევებისა და პროვოკაციებისა, მმართველი გუნდი ქვეყანაში მშვიდობას შეინარჩუნებს.

"მიუხედავად არსებული გამოწვევებისა და პროვოკაციებისა, ქვეყანაში შევინარჩუნებთ მშვიდობას, უსაფრთხოებას და სტაბილურობას ჩვენი მოქალაქეებისთვის. მოსახლეობა უნდა იყოს მშვიდად, ჩვენ არავითარი საშიშროება და საფრთხე არ გვემუქრება. ასე მშვიდად უნდა გავაგრძელოთ ქვეყნის შენება“, - აღნიშნა ირაკლი ღარიბაშვილმა.

პრემიერის თქმით, იანვარში საქართველოს 18%-იანი ეკონომიკური ზრდა აქვს.

"იანვარი ძალიან აქტიურად, ძლიერად დავიწყეთ - 18%-იანი ეკონომიკური ზრდა გვაქვს, რაც უპრეცედენტოა მთელ რეგიონსა და ევროპაში. ექსპორტი 47%-ითაა გაზრდილი, ასევე ტურიზმისა და სხვა ყველა მიმართულებით ზრდა გვაქვს. მნიშვნელოვანია, რომ ეს ტემპი არ შენელდეს. პირიქით - უნდა შევინარჩუნოთ და კიდევ უფრო უნდა გავზარდოთ. აქტიურად უნდა დავიწყოთ ის პროგრამები, რაც დავაანონსეთ - დასაქმების პროგრამა, ასევე ეკონომიკის დამაჩქარებლების წამახალისებელი პროექტები. ჩვენ, ყველა მოწოდებული ვართ, რათა ეს ტემპი შევინარჩუნოთ. რეგიონში დიდი გამოწვევებია, მაგრამ უნდა გადავეწყოთ ისე, რომ მაღალი ეკონომიკური ზრდა შევინარჩუნოთ. ამიტომ საჭიროა ბიზნესთან მეტი კომუნიკაცია. ვიცე-პრემიერი ლევან დავითაშვილი, ასევე ფინანსთა მინისტრი ხვდებიან და ესაუბრებიან ბიზნესის წარმომადგენლებს. ამ კვირაში მეც აქტიურად ჩავერთვები. ასე რომ, ჩვენ უნდა შევინარჩუნოთ მაღალი ეკონომიკური ზრდის ტემპი ამ წელს“, - განაცხადა ირაკლი ღარიბაშვილმა.