"მემუქრებიან, სადაც გნახავთ, ქათამივით დაგკლავთ, თავს წაგაჭრითო, იგინებიან" - პრორუსული, ე.წ. "ალტ-ინფოს" დაჯგუფება სამოქალაქო აქტივისტის დატერორებას ცდილობს
სამოქალაქო აქტივისტი, სამირა ბაირამოვა მის მიერ გამოხატული პროტესტის გამო ძალადობრივი, პუტინისტური ჯგუფის მხრიდან მუქარის სამიზნე გახდა. მის უფლებებს ახალგაზრდა იურისტთა ასოციაცია იცავს და აცხადებს, რომ "სამირა ბაირამოვას მიმართ მუქარა დროულად უნდა აღიკვეთოს".
14 მარტს, მარნეულში, რუსული პროპაგანდისტული არხის, "ალტ-ინფოს“ მიერ დაფუძნებული პოლიტიკური პარტიის - "კონსერვატიული მოძრაობის“ ოფისის გახსნა სამირა ბაირამოვამ ოფისის ფასადზე უკრაინისა და ევროკავშირის დროშების დახატვით გააპროტესტა. ამას ძალადობრივი ჯგუფის მხრიდან სოციალურ ქსელში მუქარის შემცველი გზავნილები მოჰყვა, ხოლო 16 მარტს, რადიკალური ჯგუფის წევრებმა მარნეულში მუქარის შემცველი ვიდეომიმართვა ჩაწერეს.
შინაგან საქმეთა სამინისტრომ გამოძიება სისხლის სამართლის კოდექსის 151-ე მუხლით (მუქარა) დაიწყო. თუმცა, საიას შეფასებით, ის ფაქტი, რომ "ალტ-ინფოს“ მიერ 5-6 ივლისს განხორციელებული ჯგუფური ძალადობის ორგანიზება და ამგვარი ქმედებისაკენ საჯაროდ მოწოდება ამ დრომდე დაუსჯელია, გამოძიების მიმართ ნდობას ამცირებს და ახალისებს მოძალადე ჯგუფების ქმედებებს.
პარალელურად, შინაგან საქმეთა სამინისტრომ სამირა ბაირამოვას მიმართ ადმინისტრაციული სამართალდარღვევის საქმის წარმოება დაიწყო და მის მიმართ იერსახის დამახინჯების მუხლით ოქმი შეადგინა.
"შენ დედას ... რო გნახავ, ქათამივით უნდა მოგაჭრა ეგ თავი“, "მიწიდან ამოგთხრით, სად წახვალ“ - სამირა ბაირამოვამ მსგავსი შეტყობინებები მიიღო, რომელშიც მუქარის ავტორები, განსაკუთრებულად უსვამენ ხაზს მის ეთნიკურ წარმომავლობასა და რელიგიურ კუთვნილებას.
მარნეულელი აქტივისტის, სამირა ბაირამოვას მშობლებმა ოფიციალური წერილით მიმართეს საქართველოს პრეზიდენტ სალომე ზურაბიშვილს, პრემიერ-მინისტრ ირაკლი ღარიბაშვილს და შინაგან საქმეთა მინისტრ ვატანგ გომელაურს. ისინი მათ რეაგირებისაკენ მოუწოდებენ და შვილის უსაფრთხოების დაცვას სთხოვენ.
სამირა ბაირამოვა ambebi.ge - სთან ჰყვება:
- 14 მარტს შევღებე "ალტ-ინფოს“ ოფისი მარნეულში - უკრაინის და ევროკავშირის დროშები მივახატე. მანამდე მივმართე მთავრობას და სუს-ს, დახურეთ ეს პროვოკატორებისა და მოღალატეების ოფისი-მეთქი, მაგრამ არ მომისმინეს. პროტესტი გამოვხატე ყველა მარნეულელისა და ქვეყნის პატრიოტის სახელით, რითაც სოლიდარობა გამოვუცხადე უკრაინას. "ალტ-ინფოს“ ხალხისთვის მინდოდა კიდევ ერთხელ მეთქვა, რომ ჩვენი გზა დიდი ხანია არჩეულია და ჩვენ ევროპელები ვართ. ისინი მანამდე, "ქართული მარშის“ სახელით მოქმედებდნენ და მარნეულში პროვოკაციით იყვნენ დაკავებულნი. ყველამ იცის, რომ ეს მავნე და აგრესიული ჯგუფი რუსეთიდან ფინანსდება, ისინი არიან ტერორისტები. მას მერე, რაც ევროკავშირში გასაწევრებლად განაცხადი შევიტანეთ, ისინი უფრო გააქტიურდნენ. ეს რუსეთუმეები ამართლებენ რუსეთის დამპყრობლურ პოლიტიკას. ჩვენ გვაქვს 2008 წლის მაგალითი, როცა რუსეთი თავს დაესხა საქართველოს. ყველამ ვიცით, რომ დღეს უკრაინაში საქართველოს ბედიც წყდება და როგორც საქართველოს ერთგული მოქალაქე, ამ ყველაფერზე ვნერვიულობ. არ მინდა ჩვენს ქვეყანაში გაგრძელდეს ის, რაც უკრაინაში ხდება, არ მინდა, ჩემი სამშობლო კვლავ რუსეთის იმპერიაში დაბრუნდეს, შესაბამისად, ამ მიზნით და სოლიდარობის გამო შევღებე პუტინისტების ოფისი. ვინაიდან ვიცოდი, რომ ისინი არიან საშიში და მავნე ჯგუფები, არ მინდოდა სხვა აქტივისტებიც გამეხვია შარში, მარტომ გადავწყვიტე ამ აქტის ჩადენა. მათი ოფისი გახსნილი კი იყო, მაგრამ არ ფუნქციონირებდა. ადრე იმავე ადგილზე იყო "მარშისტების“ ოფისი და ესენიც იგივე აქტივისტები არიან. უბრალოდ, სახელი შეიცვალეს, მაგრამ რა მნიშვნელობა აქვს, ხალხი და მათი მიზნები ხომ იგივეა.
ამ დღის მერე, მემუქრებიან, სადაც გნახავთ, ქათამივით დაგკლავთ, თავს წაგაჭრითო, იგინებიან, "ფეისბუქზე“ მწერენ და მწერენ მათი ტროლები. მუქარების გამო პოლიციას მივმართე, სადაც მითხრეს, რომ ის მხარეც გიჩივით იმის გამო, რომ მათი ქონება დააზიანე და ადმინისტრაციული სამართალდარღვევის საქმის წარმოება დაწყებულიაო. ამის შემდეგ, ალტინფოელები (დაახლოებით 50 კაცი) ჩამოვიდნენ მარნეულში, სადაც ჩაწერეს და გაავრცელეს ღია მუქარის ვიდეო. მათ შორის არც ერთი ადგილობრივი არ ყოფილა. გუშინ კი ადგნენ და რატომღაც, "ნაციონალების“ ოფისი გადაღებეს, საკმაოდ უცენზურო სიტყვებით და ფიგურებით.
- რამე გაკავშირებთ "ნაციონალებთან“?
- მარტო "ნაციონალებთან" კი არა, საერთოდ არც ერთ პარტიასთან არაფერი მაკავშირებს, არც ოდესმე ვყოფილვარ ამ კონკრეტული პარტიის მხარდამჭერი. რუსეთუმეებმა ძალიან კარგად იციან, ვინ ვარ და ისიც, რომ არაფერი მაკავშირებს "ნაციონალებთან". მარნეულში ეს პარტია ძლიერია და ხელისუფლებას მასთან დიდი ბრძოლა აქვს გამოცხადებული. როგორც ჩანს, მთავრობაც არის ჩართული და მანქანასავით იყენებს ამ ჯგუფებს თავისი მიზნებისთვის, სხვაგვარად, ხმას როგორ ამოიღებდნენ. ისინი მარნეულში 2 წლის წინაც აწყობდნენ და ახლაც აორგანიზებენ პროვოკაციას. ამ პარტიას იმიტომ შეეჯახნენ, რომ მათი ჩათრევა უნდათ პროვოკაციაში.
გამოძიება დაწყებულია, მაგრამ ჩემი ინფორმაციით, მეორე მხრიდან არავინაა დაკითხული, შსს საქმის კურსშია მუქარებზე, მაგრამ არ ვიცი, რას ელოდებიან. შს მინისტრის პარლამენტში გამოსვლისას გამოძიებასთან დაკავშირებით გამოხატული დაპირება იმედის მომცემი იყო, მაგრამ ჯერ რეაგირებას ვერ ვხედავ. ამ ბანდფორმირების წევრები ადრეც მემუქრებოდნენ მოკვლით, შევიტანე სარჩელი და არც მაშინ ყოფილა რეაგირება. საზოგადოების პროტესტის იმედი მაქვს, იქნებ ამის შემდეგ მაინც დაიწყოს გამოძიება.
- მარნეულში იციან, მათი სახით ვისთან აქვთ საქმე, მომხრეები გაიჩინეს?
- შეიძლება მარნეულელები კარგად არ იცნობდნენ მათ, არ ჰქონდათ ამ ხალხზე საკმარისი ინფორმაცია, მაგრამ ამ ყველაფრის შემდეგ, მათთვის ცნობილია, ვინ არიან ესენი, რა ამოძრავებთ და რამდენად საფრთხის შემცველია მათი საქმიანობა ეთნიკური და რელიგიური უმცირესობებისთვის. ეს ადამიანები მარტო იმიტომ არიან დასაჭერები, რომ გამოაცხადეს, რუსეთში წასვლას ვაპირებთო. სად მიდიხარ, რატომ და რა მიზნები გაქვს, თან ასეთ დროს, ხომ ჩნდება კითხვები?
მე სამოქალაქო აქტივისტი და უფლებადამცველი ვარ, ვმუშაობ ეთნიკური უმცირესობების საკითხებზე, ქალთა და ბავშვთა უფლებებზე, დისკრიმინაციაზე და ყველა სხვა პრობლემებზე. ვფიქრობ, კონკრეტული ადამიანები დაბადებულნი არიან გამბედაობისთვის. მე უბრალოდ ვარ ერთ-ერთი ასეთი ადამიანი, ზოგადად, გამბედაობა მაქვს ხასიათში და მიყვარს ბრძოლა, სამოქალაქო აქტივიზმი. გავაკეთე ის, რაც ნამდვილად მაწუხებს როგორც საქართველოს მოქალაქეს, ნამდვილად არ მინდა საქართველოში განმეორდეს 2008 წელი, არ მინდა ჩემს სამშობლოში რუსეთის იმპერიამ კვლავ დადგას ფეხი და აქაც განახორციელდეს ძალადობრივი ქმედებები. ჩემთვის სამწუხარო ამბავი ისაა, რომ ამ ყველაფერში ჩართულია თვითონ საქართველოს მოქალაქე (არ აქვს მნიშვნელობა, ქართველი იქნება, სომეხი, თუ - აზერბაიჯანელი). გული მწყდება და ჩემთვის დიდი შეურაცხყოფაა, როცა ჩვენი მოქალაქეები არიან მოძალადე იმპერიის მონები და მის მიზნებს ახორციელებენ საქართველოში. დღეს საიას წარმომადგენლები ჩამოვლენ მარნეულში, მივმართავ პირადი დაცვის მოთხოვნით და დაზარალებულის სტატუსისთვის პოლიციას. ველოდები, როდის გაიღვიძებს სახელმწიფო და დაიწყებს რეაგირებას. ხელისუფლებამ დაუშვა შეცდომა, როცა ეს პარტია დაარეგისტრირა. კანონით დაუშვებელია ისეთი პარტიის რეგისტრაცია, რომელიც ეწინააღმდეგება კონტიტუციას და ქვეყნის ეროვნულ ინტერესებს. კარგს იზამს ხელისუფლება, თუ შეცდომას გამოასწორებს და ამ მავნებლების საქმიანობას აკრძალავს...
იხილეთ ასევე: