“ჩვენს ქვეყნებს მრავალსაუკუნოვანი მეგობრობა აკავშირებს" - "პატრიოტთა ალიანსი" მოსკოვში შეხვედრებს მართავს: რა ინფორმაციას აქვეყნებს რუსეთის ფედერალური საბჭო
რუსი სამხედროების უკრაინაში შეჭრის, რუსი ოკუპანტების მიერ მოწყობილი უმოწყალო ხოცვა-ჟლეტის პარალელურად, "საქართველოს პატრიოტთა ალიანსი" და დავით თარხან მოურავი დამპყრობლებთან რუსეთში ჩავიდნენ და შეხვედრები გამართეს.
"პატრიოტთა ალიანსისა" და თარხან მოურავის ვიზიტის შესახებ ინფორმაცია 4 აპრილს რუსეთის ფედერალური საბჭოს ოფიციალურ ვებგვერდზე გამოქვეყნდა. ინფორმაციას თან დართული აქვს შეხვედრის ამსახველი ფოტომასალა.
“საუბრისას განიხილეს რუსეთ-საქართველოს ურთიერთობის განვითარების საკითხები“, - ვკითხულობთ ვებგვერდზე, სადაც ასევე აღნიშნულია, რომ შეხვედრას ფედერაციის საბჭოს საერთაშორისო ურთიერთობათა კომიტეტის თავმჯდომარის მოადგილე, ვლადიმირ ჯაბაროვი, კომიტეტის წევრ, მიხეილ სინიცინთან ერთად დაესწრო.
"მხარეებმა რუსეთ-საქართველოს ურთიერთობების განვითარებაზე ისაუბრეს", - წერია რუსეთის ფედერალური საბჭოს ვებგვერდზე.
- “ჩვენს ქვეყნებს მრავალსაუკუნოვანი მეგობრობა აკავშირებს და დარწმუნებული ვარ, რომ საქართველოში უამრავი ადამიანია, ვინც რუსეთთან კონტაქტების გაფართოების მომხრეა“, - განაცხადა ვლადიმირ ჯაბაროვმა.
საბჭოს მიერ გამოქვეყნებულ ინფორმაციაში ნათქვამია, რომ დავით თარხან მოურავმა შეხვედრაზე რუსულ მხარეს "პატრიოტთა ალიანსის“ საქმიანობის შესახებ ინფორმაცია მიაწოდა და აღნიშნა, რომ საერთაშორისო ასპარეზზე ქვეყნის ნეიტრალიტეტის ერთგულია და ემხრობა საქართველოსა და რუსეთს შორის ორმხრივად მომგებიანი კავშირების შემდგომ შენარჩუნებასა და განვითარებას.
შეხვედრის შემდეგ გადაწყდა დიალოგის გაგრძელება.