აფეთქებები ხარკოვში, ევაკუაციისკენ მოწოდება დონეცკში და უკრაინელების იერიში მტერზე - რა ხდებოდა გასულ ღამეს უკრაინაში
ქალაქ ხარკოვსა და მის მახლობლად ღამით აფეთქებების ხმები ისმოდა, - ინფორმაციას უკრაინული მედია ავრცელებს.
მათივე ცნობით, საუბარია ოთხ აფეთქებაზე ხარკოვში და ერთზე - ქალაქთან ახლოს.
თვითმხილველები აცხადებენ, რომ ბელგოროდიდან რაკეტები ისროლეს.
შეგახსენებთ, გუშინ საღამოს რუსმა ოკუპანტებმა ხარკოვის ოლქის ჩუგუევის რაიონის დაბა პეჩენეგი დაბომბეს, რის შედეგადაც დაშავდა 2 წლამდე ასაკის ბავშვი და 64 წლის კაცი. ამასთან, თავდასხმის გამო დაზიანდა საცხოვრებელი კორპუსები.
- დონეცკის გუბერნატორი, პავლო კირილენკო აცხადებს, რომ ოლქში დარჩენილი 350 000 ადამიანის გაყვანა აუცილებელია მათი სიცოცხლის გადასარჩენად და იმისთვის, რომ უკრაინის არმიას ქალაქების უკეთ დაცვის შესაძლებლობა ჰქონდეს.
"მთელი ქვეყნის ბედს დონეცკის რეგიონი გადაწყვეტს. როგორც კი ნაკლები ხალხი იქნება, ჩვენ შევძლებთ მეტი კონცენტრირება მოვახდინოთ მტერზე და შევასრულოთ ჩვენი ძირითადი ამოცანები“, - აღნიშნა კირილენკომ.
გუშინ მუდმივად ოლქის კიდევ ერთი ქალაქი, სლავიანსკი იბომბებოდა. მერმა ვადიმ ლიახმა მოსახლეობას ქალაქის დატოვებისკენ მოუწოდა.
- უკრაინის შეიარაღებული ძალების საჰაერო ძალების საჰაერო თავდაცვამ, გასული დღის განმავლობაში, მოწინააღმდეგის 9 ფრთოსანი რაკეტა, საბრძოლო მასალის ორი საცავი, ორი ოცეულის საყრდენი პუნქტები და უამრავი აღჭურვილობა გაანადგურა, ამის შესახებ საჰაერო ძალები იუწყება.
"კერძოდ, საჰაერო სარდლობა "აღმოსავლეთმა“ დნეპროპეტროვსკის რეგიონში შავი ზღვიდან გასროლილი „კალიბრის“ ტიპის 7 ფრთოსანი რაკეტიდან 6 გაანადგურა. დაახლოებით 20:00 საათზე დასავლეთის საჰაერო სარდლობამ მტრის კიდევ სამი ფრთოსანი რაკეტა გაანადგურა,“- აღნიშნულია ინფორმაციაში.
საჰაერო ძალების ცნობით, უკრაინული ავიაცია აგრძელებს მტრის შეტევას რამდენიმე სტრატეგიული მიმართულებით და დამპყრობლების პოზიციებს დარტყმას აყენებს. კერძოდ, ბომბდამშენებმა და მოიერიშე თვითმფრინავებმა გაანადგურეს ორი საველე საწყობი, ორი ოცეულის საყრდენი პუნქტები, ოცამდე ერთეული ტექნიკა და რუსების ცოცხალი ძალა.
იხილეთ ასევე: