"საჯაროდ არ ამბობენ, მაგრამ ვანო ჩემზეა გაბრაზებული" - რას ამბობს გიორგი გაბუნია "ღამის შოუს" გუნდის მიერ "მთავარი არხის" დატოვებასა და თანამშრომლების შემცირებაზე?
ცოტა ხნის წინ ცნობილი გახდა, რომ "ვანოს შოუს" გუნდმა "მთავარი არხი" დატოვა და ახალ სატელევიზიო სეზონს "ტვ პირველის" ეთერში დაიწყებს. ამას "მთავარი არხის" მენეჯმენტისგან უკმაყოფილება მოჰყვა.
ტელეკომპანიის განცხადებით, "ვანოს შოუს" გუნდი იყო ერთადერთი, არხზე შექმნილ ფინანსურ კრიზისს რომ ვერ გაუძლო და ამის გამო დატოვა ტელეკომპანია. ამას თავად ვანო ჯავახიშვილის მხრიდან მწვავე შეფასებები მოჰყვა. მან "მთავარი არხის" განცხადებას "სრული უხამსობა და ბოროტება" უწოდა.
არხის ამჟამინდელი დირექტორი გიორგი გაბუნია ამბობს, რომ ნებისმიერი თანამშრომლის წასვლა მისთვის ძალიან მძიმეა. როგორც მან განმარტა, მას შემდეგ რაც ნიკა გვარამია დაიჭირეს, მოუწია პავილიონის დახურვა, რამაც გადაცემების შემცირება გამოიწვია.
"ძალიან რთულია ჩემთვის, როცა საქმე მიდის შემცირებებამდე. თუმცა როცა ნიკა დაიჭირეს იძულებული გავხდი, რომ ეს უნდა გამეკეთებინა. საშინელებაა ამის კეთება. მომიწია მძიმე გადაწყვეტილებები. მქონდა მომენტი, როცა ვამბობდი, რომ აღარ შემიძლია ამ ადამიანების ცრემლების ყურება.
ამ ყევლაფერს მოჰყვა გადაცემების შემცირება. იცით, რომ მთელი პავილიონი დავხურეთ. იგივე ვანოს შოუ დაიხურა, ვანო გადავიდა სხვა არხზე, ესეც უმძიმესია და ძალიან დიდი დანაკარგია. ყველა ჩემზეა გაბრაზებული. საჯაროდ არ ამბობენ, მაგრამ ვანო ჩემზეა გაბრაზებული. ნიკაზე არ იქნება სამაგიეროდ გაბრაზებული" - ამბობს გაბუნია გადაცემა "შენი შუადღის" ეთერში.
ნახეთ ასევე:
ნახეთ ვიდეო: