"ნიკა მელიას ინიციატივა იყო არჩევნები, მაგრამ ყველაფერს აქვს თავისი დრო, ადგილი და ფორმა" - სოფო ჯაფარიძე
თვითონ ნიკა მელიას ინიციატივა იყო არჩევნები, მაგრამ ყველაფერს აქვს თავისი დრო, ადგილი და ფორმა - წარმოუდგენელია, დღეს როდესაც ქვეყნის მესამე პრეზიდენტს კლავენ, სხვა რამეზე ვისაუბროთ, - ამის შესახებ თბილისის საკრებულოს ფრაქცია „ერთიანი ნაციონალური მოძრაობის“ წევრმა სოფო ჯაფარიძემ განაცხადა, რითაც „ნაციონალური მოძრაობის“ წევრების ნაწილის მიერ პარტიის თავმჯდომარის და პოლიტსაბჭოს არჩევნების ჩატარების მოთხოვნას გამოეხმაურა.
მისივე თქმით, პარტიის ნომერ პირველი საზრუნავი ქვეყნის მესამე პრეზიდენტის, მიხეილ სააკაშვილის საზღვარგარეთ სამკურნალოდ გაყვანაა და არსებულ მოცემულობაში შიდაპარტიულ საკითხებზე საუბარი მიუღებელია.
"თვითონ ნიკა მელიას ინიციატივა იყო არჩევნები, მაგრამ ყველაფერს აქვს თვისი დრო, ადგილი და ფორმა. დღეს, როდესაც ყველასთვის, პარტიისთვის და თითოეული ჩვენგანისთვის ყველაზე მნიშვნელოვანი და პრიორიტეტული ქვეყნის მესამე პრეზიდენტის ჯანმრთელობის მდგომარეობაა, ამაზე საუბარი უადგილო იყო.
დღევანდელი დღე იყო ჩემთვის სრულიად გაუგებარი. შიდაპარტიულ დისკუსიებში ყოველთვის გვაქვს ჩვენ იმის შესაძლებლობა, რომ აზრი დავაფიქსიროთ, მაგრამ ჩემთვის სრულიად მიუღებელია ის ფორმა, რა ფორმითაც ეს მოხდა. ჩვენი ნომერ პირველი საზრუნავი ახლა მიხეილ სააკაშვილის საქართველოდან გაყვანაა. წარმოუდგენელია, დღეს როდესაც ქვეყნის მესამე პრეზიდენტს კლავენ, სხვა რამეზე ვისაუბროთ," - განაცხადა სოფო ჯაფარიძემ.