"გარდაცვლილს რომ ვაცმევდი, ჩვენს მეჯვარეს ვთხოვე, მარტო დამტოვე-მეთქი. მჯეროდა, თუ ძალიან ვთხოვდი, დაბრუნდებოდა" - ნელი აგირბა თავს დატეხილ ტრაგედიასა და შინ დაბრუნებაზე

ნელი აგირბამ ნანუკა ჟორჟოლიანის გადაცემაში მეუღლის გარდაცვალებაზე ისაუბრა. ტელეწამყვანი ამჟამად ბათუმში სამ შვილთან და მამასთან ერთად ცხოვრობს... მიუხედავად იმისა, რომ წლები გავიდა, ტკივილიან წარსულზე ლაპარაკი უჭირს.

ნელი აგირბა:

"ყველაზე მძიმე, რთული ჩემი მეუღლის გარდაცვალება იყო. ეს იყო ყოვლად მოულოდნელი, რის შემდეგაც საკმაოდ დიდხანს ვებრძოდი სიკვდილის სურვილს. წასული იყო საზღვარგარეთ და როდესაც ველოდით, არ ჩამოვიდა. მერე დავიწყე რეკვა. აღმოჩნდა, რომ სასტუმრო დატოვებული არ ჰქონდა. გავაღეთ კარი და აღმოჩნდა, რომ გარდაცვლილი იყო. ბოლო მომენტამდე არ მჯეროდა, ვეუბნებოდი, ექიმი მოიყვანეთ, დაადასტურეთ-მეთქი.

შემდეგ, როდესაც გარდაცვლილს ვაცმევდი, მეგობარს - ჩვენ მეჯვარეს ვთხოვე, ხალხი გაიყვანე, ცოტა ხანი მარტო დამტოვე-მეთქი. მჯეროდა, რომ თუ ძალიან ვთხოვდი, დაბრუნდებოდა. შემდეგი სურვილი იყო, რომ როგორმე მომეხერხებინა, რომ მეც აღმოვჩენილიყავი მასთან ერთად კუბოში, აქ დარჩენა არ მინდოდა, მაგრამ ბავშვებს ვჭირდებოდი ძალიან.

როდესაც იღვიძებ, რამდენიმე წამია, როდესაც არ გახსოვს რა გჭირს, ეს ძალიან მეხმარებოდა... ნელ-ნელა დავიწყე დაბრუნება.

სიკვდილის სურვილი მას შემდეგ დავამარცხე, ნოაზე რომ დავრჩი ფეხმძიმედ... რთული ორსულობა მქონდა. თან დავბრუნდი ჩემი ბავშვობის სახლში, საიდანაც გამოქცეული ვიყავი და რთული ამბები ხდებოდა. ვიცოდი, იქ რომ ვბრუნდებოდი, ან მოვკვდებოდი, ან გავთავისუფლდებოდი. ჩემ თავს ვეუბნებოდი, მიყვარხარ, მიყვარხარ...

ერთმანეთი ფესტივალზე გავიცანით, პირველივე ნახვაზე ვიგრძენი, რომ ერთნი ვიყავით. საათობით ვუყურებდით ერთმანეთს და ვიკარგებოდით, გვეტირებოდა. ასეთი ერთიანობიდან სამყაროს ამოგლეჯვა იყო ნგრევა. ექვსი თვე ვიყავით ერთად. ცოტა იყო, მაგრამ ძალიან ინტენსიურ ტემპში ვცხოვრობდით.

ბათუმში მამაჩემს და საკუთარ ბავშვობას დავუბრუნდი. ათი წელი მუსიკა არ დამიწერია, მაგრამ მერე გაიხსნა... პირისპირ დარჩენა ამ ტრავმებთან ძალიან მტკივნეული იყო... ჩელე 2017 წელს გარდაიცვალა და ნოა 3 წლის შემდეგ - 2020-ში დაიბადა. ძალიან ველოდი, ჩასახვის მომენტიც კი ვიგრძენი. სესი მაშინ 7 წლის იყო და 3 წლის ევას უვლიდა. მადლიერი ვარ ჩელესი, ჩემი მასწავლებელი იყო და არის.

დღეს ძირითადად დედა ვარ... მაგრამ საკუთარი თავისთვის თუ არ იტოვებ დროს, მერე იწყება უკმაყოფილება... მედიტაციას მივმართავ და ვსწავლობ...

ნელი აგირბას პირველი ქორწინებიდან მსახიობ ილო ბეროშვილთან ორი შვილი - გოგონები ჰყავს. მეორე ქორწინება ირაკლი ძიმისტარაშვილთან, რომელსაც მეტსახელად "ჩელეს" ეძახდნენ, ხანმოკლე აღმოჩნდა. ცნობილი ინფექციონისტის მარინა ენდელაძის შვილი, სასტუმროში გულის პრობლემებით გარდაიცვალა. ირაკლი მაშინ ჩოგბურთელ შვილს შეჯიბრზე ახლდა... ნელიკოს მესამე შვილი - ნოა, ხმის რეჟისორ ეშტონ ლაღიძისგან შეეძინა, თუმცა წყვილს თავისი ურთიერთობის შესახებ ღიად არასოდეს ულაპარაკია.