"იმედის" ჟურნალისტის ზარი მირჩევნია, თუ თქვენი ჟურნალისტის კარზე ბრახუნი, ავირჩიო?" - რატომ დაუპირისპირდა ნათია ფანჯიკიძე ნოდარ მელაძესა და ინგა გრიგოლიას?
"იმედის" ჟურნალისტის ზარი მირჩევნია, თუ თქვენი ჟურნალისტის კარზე ბრახუნი, ავირჩიო?“ - ასე იწყება ფსიქოლოგ ნათია ფანჯიკიძის სტატუსი სოციალურ ქსელში, რომელზეც "ტვპირველი“ ჰყავს მონიშნული. ცხარე დისკუსიიდან, რომელიც ირაკლი ალასანიას მეუღლის სტატუსზე გაიმართა, ირკვევა, რომ დღეს, ტელევიზიის ჟურნალისტი ნათია ფანჯიკიძეს სახლში კარზე ბრახუნით ესტუმრა. ის მისი სახლის მისამართზე რეგისტრირებულ შპს-ს ეძებდა.
"სოლოლაკში ვცხოვრობ. გიკრძალავთ ჩემ სახლში მოთრევას დაუპატიჟებლად ყველას. ვატო წერეთელი, გესმის ხომ? თუ დაგპატიჟო ყავაზე და გავიაროთ ეს საკითხი?
გავჩუმდი, შემჭამეს, ხმა ამოვიღე შემჭამეს. ამათი აგენტები ხომ ყველა არჩევნების თუ ყველა მიტინგის წამოწყებისას გარშემო მირბენენ და მზვერავენ და "აზრებს იკვლევენ..." თქვე საცოდავებო, ჩუმ-ჩუმელა ხალხი არ ვართ ჩვენ. თუ რამეს დააპირებს, დავწერ. მანამდე მაცადეთ ვიცხოვრო ამ ქვეყანაში. ჩემი ოთხი ზრდასრულის და ერთი თინასგან შემდგარი ოჯახიდან სამი აშშ-ში მუშაობს. არ წავალ თქვენს ჯინაზე...
გამეორდება ასეთი რამ, ვურეკავ პოლიციას. კარგად იცოდეთ ყველამ, არ ხართ დაპატიჟებული. ეს სახლთან ალყები რომელ კანონში წერია, ეგეც თან წამოიღეთ ხოლმე. მილიონ ადამიანს აქვს დარეგისტრირებული იურიდიულ მისამართად სახლის მისამართი, მე მგონი "კამარას“ პირველი მისამართიც, სანამ ოფისი გვექნებოდა, ბინის მისამართი იყო დარეგისტრირებული. ეს არ იძლევა საფუძველს შემოჭრის", - წერს ნათია ფანჯიკიძე, რომელსაც კომენტარებში ნოდარ მელაძე გამოეხმაურა.
მიმოწერა "ფეისბუქის" სტატუსზე:
ნოდარ მელაძე: ნათია, ჟურნალისტი ეძებდა კომპანია "კრატოს ჯგუფს“, რომელიც აღმოჩნდა, რომ თქვენს ბინაშია რეგისტრირებული.
ნათია ფანჯიკიძე: და რა კომპანია ყოფილა, რამ დაგაინტერესათ? რამე უკანონოა? გინდა კომპანიას რა უფლებით ადგები, თუ უკანონო არაფერია და მითუმეტეს, რომ მე არ ვიცოდი, თორემ თქვენ ნამდვილად გადასარევად იცით, რომ როგორც დარეგისტრირდა, ისე გდია ეგ რაღაც კომპანია. კიდევ უკეთ იცით, რომ აქ ვცხოვრობ. და თუ აქამდე არ იცოდით, ახლა კარგად დაიმახსოვრეთ, რომ მე აქ ვცხოვრობ. ალბათ წერეთლებმაც არ იციან, სად ვცხოვრობ, ხომ?
კარზე ბრახუნი იყო, შპს რაღაც აქაა? მე ვუთხარი გვერდით კარში (არქიტექტურული ფირმაა და ვიფიქრე, მათ ეძებენ-მეთქი) იმათ უთხრეს, - ჩვენ არ ვართო და მიბრახუნებს ისევ - "ტვ პირველიდან“ ვართ, ირაკლი ალასანიას მოძებნაში ვერ დაგვეხმარებით? ვუთხარი, ვერა, ძვირია ბილეთი ნიუ-იორკამდე. და არ იცით ეს შპს რაღაც? მე ვუთხარი, პირველად მესმის. მოკლედ, დავურეკე ირაკლის და აღმოჩნდა, რომ ამ დასახელების შპს მართლა შეუქმნია, მაგრამ შპს არ მუშაობს. როგორც შექმნა, ისე მიაგდო და შესაბამისად, მეც აზრზე არ ვიყავი. ხოდა, სანამ, არ ვიცი, ამჯერად ვისი შეკვეთით ან რით ვერ გავიწყდებით ვერცერთ მხარეს, დეტექტივს დაწერთ, თხოვნა მაქვს, კარს იქიდან რომ ვამბობ, ბოდიში, პირსახოცით ვარ და ვერ ვაღებ კარს, აი, ეგ იდუმალად მიხატ-მოხატოთ, რომ ჩემი მშვენიერი ხმა კოხტად ისმოდეს გამოსახულების გარეშე.
ნოდარ მელაძე: ნათია, მოვედით ოფისში და დაგვხვდა თქვენი ბინა. მგონი, გასაგებად აგიხსენით. თქვენ თუ არ იცით, რომ თქვენს ბინაში კომპანიაა რეგისტრირებული, ძაან უცნაურია. რეესტრში მონაცემების რეგისტრაციის დროს მესაკუთრის თანხმობაა საჭირო.
ნათია ფანჯიკიძე: ძალიან კარგად იცი, რომ ეს ჩემი სახლია და ვცხოვრობ, ისიც კარგად იცი, სად არის ირაკლის ოფისი. ასევე ისიც იცი, რომ ირაკლი არაა თბილისში. და სხვათა შორის, თვეების წინ დომინიკის ფორბსთან ინტერვიუ რომ წამლად ჩააგდე და წინ საოცრებები წაუმძღვარე "კრახით წასულ მინისტრზე", საოცარი გადაცემა გააკეთე, თითქოს რამეს უკანონოს აკეთებდეს ირაკლი, მაგაზე არც ვიკადრე კითხვა დამესვა ან რამე მეთქვა. აი, სახლში ბრახა-ბრუხი კი ნამეტანია. თორემ გადაცემა არ გამკვირვებია, ნეტავ რომელმა შეუკვეთა - თქო, - გავიფიქრე და იქვე დავივიწყე...
- ნათია ფანჯიკიძემ სტატუსსზე ინგა გრიგოლიაც მონიშნა, იმ იმედით რომ მას ეცოდინებოდა, კონკრეტულად რატომ მიადგა სახლში "ტვპირველის" ჟურნალისტი, თუმცა გრიგოლიასგან არც თუ სასიამოვნო პასუხი მიიღო...
