მასშტაბური გაფიცვა New York Times-ში -  თანამშრომლები ხელფასის გაზრდას ითხოვენ: რამდენია მათი წლიური შემოსავალი

The New York Times-ის ჟურნალისტებმა და სხვა თანამშრომლებმა, ჯამში 1100-მა ადამიანმა 24 საათით გაფიცვა გამოაცხადა და მუშაობაზე უარი თქვა. ბოლო 40 წლის განმავლობაში ეს არის პირველი ყველაზე მასშტაბური გაფიცვა კომპანიისთვის.

Newsroom-ის თანამშრომლები და გუნდის სხვა წევრები ამბობენ, რომ მათ მობეზრდათ "ვაჭრობა", რომელიც უკვე თვეების განმავლობაში მიმდინარეობს ხელმძღვანელობასთან ხელფასის გაზრდისა და დისტანციურად მუშაობის სქემის განსაზღვრის მოთხოვნით.

ნიუ-იორკის პროფკავშირი The NewsGuild-ი "ტვიტერში" აქვეყნებს განცხადებას, სადაც აღნიშნულია, რომ 2021 წლის მარტის შემდეგ მოლაპარაკებები მიმდინარეობს, თუმცა პროცესი გაიწელა და შედეგი არ ჩანს. გამოცემის თანამშრომლები ითხოვენ ხელფასის გაზრდასა და დისტანციურად მუშაობის შესაძლებლობას.

• "არ არის მარტივი უარი თქვა საყვარელ საქმეზე, მაგრამ ამ გადაწყვეტილების მიღება გვიწევს, რათა უკეთესი ნიუსრუმი გვქონდეს“, - აცხადებენ პროტესტის მონაწილეები.

აღსანიშნავია, რომ ისინი Times Square-ზეც აპირებენ აქციის გამართვას.

გაზეთის მთავარი რედაქტორის მოადგილემ, კლიფ ლევიმ განაცხადა, რომ თანამშრომლებს შესთავაზეს ხელფასების 5,5%-ით გაზრდა ამ ეტაპზე, ხოლო 2023 და 2024 წლებში, 3-3 პროცენტით.

თუმცა ისინი მოითხოვენ, რომ ხელფასი დაუყოვნებლივ გაეზარდოთ 10%-ით.

• რამდენია New York Times-ის თანამშრომლების ხელფასი?

როგორც "ინსაიდერი" წერს, ახალი ამბების უფროსი რედაქტორი ერთი წლის განმავლობაში 140 000 აშშ დოლარიდან $300,000 დოლარამდე გამოიმუშავებს.

2019 წლის ბოლოდან 2022 წლის შუა პერიოდის მონაცემების მიხედვით, "ნიუ იორკ თაიმსის" თანამშრომლების წლიური ხელფასი მერყეობს 53 392 დოლარიდან 306 000 დოლარამდე, თანამდებობისა და კვალიფიკაციის მიხედვით.