მცირეწლოვანი, რომელიც ახალგორიდან თბილისში სამკურნალოდ გადმოჰყავდათ, დაიღუპა - რა გარემოებებზე წერს ოკუპირებული რეგიონის მედია

2 იანვარს, ახალგორიდან თბილისისკენ მშობლებს სამკურნალოდ წლინახევრის ბავშვი მოჰყავდათ, რომელიც გზაში გარდაიცვალა. ოკუპირებული რეგიონის მედიის ცნობით, ბავშვი ავად რამდენიმე დღის წინ გახდა.

არსებული ინფორმაციით, ცხედარი უკვე გადაასვენეს რუსების მიერ კონტროლირებად ტერიტორიაზე.

როგორც სააგენტო "რესი“ "სამხრეთ ოსეთის“ ე.წ. ხელისუფლების პრესსამსახურის ინფორმაციაზე დაყრდნობით წერს, ოკუპირებული რეგიონის ე.წ. პრეზიდენტი ალან გაგლოევი იმ კლინიკაში მივიდა, სადაც მცირეწლოვანი თავდაპირველად მიიყვანეს, თუმცა "მშობლების მოთხოვნით, იქ არ მოუთავსებიათ."

• "კვირას საღამოს რაიონულ სასწრაფო დახმარების ცენტრში შევიდა ზარი, წლინახევრის ბავშვის მშობლებმა განაცხადეს, რომ მცირეწლოვანს ჰქონდა მაღალი ტემპერატურა და ბავშვის მიყვანას კლინიკაში ვერ ახერხებდნენ, ამის შემდეგ მათთან მივიდნენ ექიმები და ბავშვს საჭირო დახმარება გაუწიეს“, - ნათქვამია პრესსამსახურის განცხადებაში, სადაც ასევე აღნიშნულია, რომ ექიმებმა მშობლებს მკაცრი რეკომენდაცია მისცეს, ბავშვის ჰოსპიტალიზაციის შესახებ, რაზეც უარი მიიღეს, მშობლებს დილამდე მოცდა და ბავშვის სამკურნალოდ წაყვანა "მეზობელ სახელმწიფოში“ სურდათ.

ოკუპირებული რეგიონის "ხელისუფლების" პრესსამსახურის ცნობით, დილით ბავშვის მდგომარეობა დამძიმდა და მშობლებმა სასწრაფო დახმარება კვლავ გამოიძახეს, რომელმაც მცირეწლოვანი რაიონულ საავადმყოფოში წაიყვანა. საავადმყოფოს ექიმმა სოსლან ჩოჩიევმა თქვა, რომ ბავშვი იმ დროს "თითქმის არ სუნთქავდა."

"როდესაც ბავშვი შემოიყვანეს, მაშინვე დავიწყეთ გულ-ფილტვის რეანიმაცია, დავუკავშირდით რეანიმატოლოგებსაც, პულსი თითქმის არ იყო. ვინაიდან მშობლები აქ მკურნალობაზე უარს აცხადებდნენ, გადაწყდა გოგონას სასწრაფოდ გაგზავნა მეზობელ სახელმწიფოში, გზად რეანიმაციული განყოფილების მუშაობა არც ერთი წუთით არ გაჩერებულა, მშობლები იქვე იყვნენ და ამის დადასტურება შეუძლიათ", -ამბობს ჩოჩიევი.