"ნაციონალურ მოძრაობას“ და ოპოზიციას მივმართავ, გაერთიანდით, მიიყვანეთ საქმე ბოლომდე... მიშამ მითხრა, ძალიან ნაწყენი ვარო" - ნიკოლოზ სააკაშვილი

საქართველოს მესამე პრეზიდენტის, მიხეილ სააკაშვილის მამამ, ნიკოლოზ სააკაშვილმა მიხეილ სააკაშვილის საქმის მოსამართლე, გიორგი არევაძეს მიმართავს, გადაწყვეტილება კანონის შესაბამისად მიიღოს და ქვეყნის ინტერესები გაითვალისწინოს.

როგორც მან აღნიშნა, მიხეილ სააკაშვილი ქართულ პოლიტიკაში ჩაბმას არ აპირებს, რადგან თავად უთხრა, რომ "ძალიან ნაწყენია“.

"მინდა მივმართო, იფიქრეთ საქართველოზე. ღმერთმა არ ქნას მისი დაღუპვა და დაინვალიდება, ძალიან ბევრ უკუპროცესს გამოიწვევს. მაგალითად, მე რომ ვიყო დღეს რაღაც კომისიის თავმჯდომარე, ხელს მოვუწერდი მიშას კი არა, ნებისმიერს. ამ დროს, როდესაც ასეთი კაცი არის დასახსნელი, შინაურშიც უნდა იყოს ერთიანობა, ეს მწყინს, არის მე იქით, შენ იქით, შენ ის გინდა, მე ეს არ მინდა.

"ნაციონალურ მოძრაობას“ და ნებისმიერ ოპოზიციას მივმართავ, გაერთიანდით, მიიყვანეთ საქმე ბოლომდე, მერე დასხედით და მოილაპარაკეთ. ენა, აზროვნება იმისთვის არის. არცერთ მათგანს არ აკლია არც ლოგიკა, არც განათლება. ქვეყნისთვის იზრუნეთ ხალხო. ნამდვილად ვიცი ერთი რამ, მიშა ქართულ პოლიტიკაში ჩაბმას არ აპირებს, ჩვენ გვქონდა ლაპარაკი, მე ქართულ პოლიტიკაში არასდროს ვიქნები, ძალიან ნაწყენი ვარო“, - განაცხადა ნიკოლოზ სააკაშვილმა.

თბილისის საქალაქო სასამართლოში ყოფილი პრეზიდენტის, მიხეილ სააკაშვილისთვის სასჯელის გადავადების, ან სასჯელისგან გათავისუფლებასთან დაკავშირებით სასამართლო პროცესი 6 თებერვალს გაიმართება. სხდომა თბილისის საქალაქო სასამართლოში 17:00 საათზე არის ჩანიშნული. პროცესზე მხარეები დასკვნით სიტყვას წარმოთქვამენ.