ანტიდოტი "ბინძური ბომბისგან" თავდასაცავად - აშშ ორგანიზმიდან რადიოაქტიური დაბინძურების განსადევნად შექმნილი აბების ტესტირებას იწყებს
აშშ-ში, "ბინძური ბომბის" ანტიდოტის აბების პირველი ტესტირება იწყება. პრეპარატი ადამიანის ორგანიზმიდან მავნე რადიოაქტიური დაბინძურების განსადევნად შეიქმნა. მიიჩნევა, რომ პრეპარატი HOPO 14-1 რამდენიმე ისეთი ნივთიერების წინააღმდეგ იმუშავებს, რაც ამ ტიპის იარაღში შეიძლება იყოს გამოყენებული, მათ შორის ურანის წინააღმდეგაც. თუ ახალი მედიკამენტი უსაფრთხო და ეფექტიანი გამოდგა, ის ბირთვული ინციდენტების ან ტერორისტული თავდასხმის პოტენციური ზიანისგან შეძლებს ადამიანების დაცვას.
დაახლოებით 42 მოხალისე ახალ პრეპარატს სხვადასხვა დოზებით მიიღებს და გვერდითი ეფექტების არსებობას შეამოწმებს. ჯანდაცვის წარმომადგენლები მოხალისეთა უსაფრთხოებაზე ინტენსიური მონიტორინგით იზრუნებენ. რაც შეეხება კვლევის პირველი ეტაპის შედეგებს, ისინი 2024 წლისთვისაა მოსალოდნელი, - ამბობენ ცდების ავტორები, რომლებიც დაფინანსებას აშშ-ს სამთავრობო სააგენტოს ჯანრთელობის ეროვნული ინსტიტუტისგან იღებენ.
- "ბინძური ბომბი“ ეს არის მასობრივი განადგურების იარაღი, რომელშიც რადიოაქტიური მასალა შერეულია ჩვეულებრივ ასაფეთქებელ ელემენტებში. მისი აფეთქების ტალღა ნაკლებია, ვიდრე ბირთვული იარაღისა, და ის ასევე განეკუთვნება არა ჩვეულებრივ სამხედრო იარაღს, არამედ ტერორისტულს, რადგანაც რადიაცია მოქმედებს უფრო ნელა და შეუძლია უფრო მეტი ადამიანი სრულიად შეუმჩნევლად დახოცოს - რადიაციის ზემოქმედებამ შეიძლება დააზიანოს ადამიანის დნმ, ქსოვილები და ორგანოები, რამაც გამოიწვიოს არაერთი დაავადება, მათ შორის სიმსივნე.
უკვე არსებობს ორი განსხვავებული წამლის ინექცია, რომელიც შეიძლება გამოყენებულ იქნას იმ ადამიანების სამკურნალოდ, რომლებიც რადიოაქტიური პლუტონიუმის, ამერიციუმის ან კურიუმის გავრცელების არეში აღმოჩნდებიან.
თუ HOPO 14-1 ეფექტიანად იმუშავებს, ის მოსახლეობას პლუტონიუმის, ამერიციუმის და კურიუმის გარდა, ურანისა და ნეპტუნიუმისგანაც დაიცავს.
წყარო: bbc
მოამზადა: ანა სიბოშვილმა