"არ მინდა დავიჯერო, რომ ეს მმართველი პარტიისადმი ჩემს სიმპათიებს უკავშირდება" - ლაშა ბასლანძე წერს, რომ სტუდენტებს შორის, რომელთაც აშშ-ს საელჩომ ვიზაზე უარი უთხრა, მისი შვილიც არის
გუშინ, "ქართული ოცნების“ თავჯდომარემ ირაკლი კობახიძემ მედიასთან გაიხსენა ანსამბლ "მართვეს“ შემთხვევა, როცა 50 ბავშვს აშშ-ის საელჩომ ვიზები არ მისცა.
"არ აქვს მნიშვნელობა, ჩემი შვილიც იყო თუ არა - თქვენ იმას ამბობთ, რომ ჩემი შვილის გამო 49 ბავშვი არ გაუშვეს ამერიკაში? ეს საერთოდ კატასტროფა ყოფილა", - ასე უპასუხა კობახიძემ ჟურნალისტს, რომელმაც მას ჰკითხა, იყო თუ არა 50 ბავშვს შორის მისი შვილიც.
კობახიძის განცხადებით, არის ცალკეული შემთხვევები, როდესაც სტუდენტებს, რომლებმაც აშშ-ის უნივერსიტეტებში ჩააბარეს, ვიზები არ ჩაურტყეს. პოლიტიკოსმა არ დაადასტურა, მათ შორის იყო თუ არა პრემიერის ვაჟიც, რომელიც ცოტა ხნის წინ ამერიკის ერთ-ერთ უნივერსიტეტში ჩაირიცხა. თუმცა მედიასთან აღნიშნა, რომ ერთ-ერთი სტუდენტი მისი კოლეგა დეპუტატის შვილია.
ტელეპროდიუსერი ლაშა ბასლანძე, რომელიც მომღერალ სალომე ბაკურაძის მეუღლეა, სოციალურ ქსელში წერს, ირაკლი კობახიძის ნახსენებ სტუდენტებს შორის მისი შვილიც საუბრობს.
"ჩემს ელენიკოზეც ლაპარაკობს ირაკლი. რამდენიმე უნივერსიტეტიდან ჰქონდა დაფინანსება და ეს ამბავი მთელმა საქართველომ იცის. მანამდე ორჯერ იყო ნამყოფი აშშ-ში. გაეროს მოდელირებულ სხდომაზეც კი იყო ნიუ-იორკში და სიტყვით წარსდგა, მაგრამ დეგნანის კანტორამ გადაწყვიტა, რომ აი, ასე დავესაჯეთ..." - დაწერა ლაშა ბასლანძემ.
ელენე ბასლანძემ შარშან ამერიკის ერთ-ერთ ცნობილ დრიუს უნივერსიტეტში ჩააბარა, რომელიც ნიუ-ჯერსიში მდებარეობს, გოგონამ 80 000-დოლარიანი გრანტი მიიღო. თუმცა საელჩომ ვიზა არ მისცა.
დეტალების გასარკვევად AMBEBI.GE ლაშას დაუკავშირდა. ჩვენს კითხვაზე, უკავშირებდა თუ არა ელენესთვის ნათქვამ უარს, მის პოლიტიკურ აქტივობას, ამბობს, რომ დაზუსტებით ვერაფერს იტყვის, თუმცა არ გამორიცხავს. ლაშა წლებია რაც "ქართული ოცნების“ ღია მხარდამჭერია და წლების განმავლობაში"ჯიდიესში“ მუშაობდა.
ლაშა ბასლანძე:
"დიახ, ელენეს აშშ-ის საელჩომ ვიზა არ მისცა და მოხდა ისე, რომ ერთი წელი გაუცდა. თავიდან ვიფიქრეთ, რომ სხვა ქვეყანაში ეცადა ბედი. ესპანეთში გავგზავნეთ სასწავლებლად, მაგრამ უნივერსიტეტი არ მოგვეწონა. ჩამოვიყვანე და მას შემდეგ სახლშია. დეპრესია დაემართა, ისე ინერვიულა. ახლა არ ვიცი, რას ვიზამთ. თავიდან მეგონა, მანამდე ბავშვი ორჯერ იყო ამერიკაში ნამყოფი და არანაირი პრობლემა არ შექმნია.
ძალიან მიყვარს ამერიკა, ნიუ-იორკი ჩემი ოცნების ქალაქია და ძალიან არ მინდა დავიჯერო, რომ ელენესთვის ვიზაზე უარის თქმა მმართველი პარტიისადმი ჩემს პოლიტიკურ სიმპათიებს უკავშირდება. წარმოიდგინეთ, კამპუსის ფულიც კი გახადილი მქონდა.
ძალიან ვინერვიულე, დიღომში ვცხოვრობ და იმასაც კი ვფიქრობდი, რომ კონსულს სახლთან დავხვედროდი და მეკითხა, ასე რატომ მოხდა. ელენეს მთელი ცხოვრება ამაზე ჰქონდა აწყობილი, ძალიან უნდოდა ამერიკაში სწავლა".