შვედეთში მოსალოდნელია ტერორისტული თავდასხმა  - დიდი ბრიტანეთი მოქალაქეებს აფრთხილებს

კვირას ბრიტანეთმა შვედეთში ჩასული თავისი მოქალაქეები შესაძლო ტერორისტული თავდასხმების შესახებ გააფრთხილა. განახლებულ სამოგზაურო რჩევებში, ბრიტანეთის საგარეო საქმეთა სამინისტრომ მოქალაქეებს სიფრთხილისკენ მოუწოდა:

"ფრთხილად უნდა იყოთ. ტერორისტები დიდი ალბათობით თავდასხმების განხორციელებას შეეცდებიან. ტურისტების თავშეყრის ადგილები კი მათი პოტენციური სამიზნე იქნება“, - ნათქვამია განცხადებაში.

ბრიტანეთის შეცვლილ სამოგზაურო რჩევებს, შვედეთის ეროვნული უსაფრთხოების მრჩეველი ჰენრიკ ლანდერჰოლმი გამოეხმაურა და აღნიშნა, რომ ანტიისლამური აქტივისტების მიერ ყურანის დაწვის შემდეგ, საფრთხის რისკი გაზრდილია - შვედეთში ყურანის დაწვა ნებადართულია სიტყვის თავისუფლების წესებით, მაგრამ მუსლიმები წმინდა წიგნის დაწვას მკრეხელობად მიიჩნევენ.

შვედეთში მოგზაურობისგან თავის შეკავებისკენ მოქალაქეებს აშშ-მაც მოუწოდა.

შეგახსენებთ, რომ 19 ივლისს, ერაყში შვედეთის საელჩოზე თავდასხმა განხორციელდა, 1-ლ აგვისტოს კი თურქეთში შვედეთის საკონსულოს თანამშრომელი დაჭრეს.